तळेगाव स्टेशन, ता. २२ : मुंबई-पुणे महामार्गावरील सोमाटणे टोलनाक्याजवळ भरधाव आरएमसी मिक्सर ट्रकच्या धडकेत दुचाकीस्वार तरुणाचा जागीच मृत्यू झाला. बुधवारी (ता. २०) रात्री आठ वाजण्याच्या सुमारास मयूर हॉटेल समोर हा अपघात झाला. वैभव ओसवाल (२५, बाजारपेठ, तळेगाव दाभाडे) असे मृताचे नाव आहे. याप्रकरणी त्यांचा चुलतभाऊ हर्षल ओसवाल यांनी तळेगाव दाभाडे पोलिस ठाण्यात फिर्याद दिली. त्यावरुन पोलिसांनी ट्रकचालक प्रवेशकुमार साकेत (२३, रा. काळोखे आरएमसी, तळेगाव एमआयडीसी मार्ग, कातवी, मूळ रा. चमरौहा, ता. सियावल, मध्य प्रदेश) अटक केली. शुक्रवारी (ता. २२) वडगाव मावळ न्यायालयासमोर हजर केले असता त्याची जामिनावर सुटका करण्यात आली. पुढील तपास सहायक पोलिस उपनिरीक्षक रवींद्र खामगळ करीत आहेत.
-----