Astad Kale: गेल्या काही दिवसांपूर्वी अभिनेता चिन्मय मांडलेकरला (Chinmay Mandlekar) अनेक नेटकऱ्यांनी त्याच्या मुलाच्या नावामुळे ट्रोल केलं. मुलाच्या नावामुळे होणाऱ्या ट्रोलिंगमुळे चिन्मयनं छत्रपती शिवाजी महाराजांची (Chhatrapati Shivaji Maharaj) भूमिका साकारणार नाही, असा निर्णय घेतला. त्याच्या या निर्णयाचं अनेकांनी कौतुक केलं तर काहींनी त्याच्या या निर्णयाला विरोध दर्शवला. अशातच आता अभिनेता अस्ताद काळेनं (Astad Kale) नावामुळे होणारे ट्रोलिंग आणि त्याच्या नावाबद्दल एका मुलाखतीमध्ये सांगितलं आहे.

काय म्हणाल अस्ताद?

आरपार या युट्यूब चॅनलला दिलेल्या मुलाखतीमध्ये अस्तादला त्याच्या नावाबद्दल आणि नावामुळे सध्या सुरु असणाऱ्या ट्रोलिंगबद्दल विचारण्यात आलं. याबाबत तो म्हणाला, "नशिब माझ्या या नावाचा कोणी सुलतान वगैरे नव्हता, त्यामुळे माझे आई-वडील वाचले. मला असं वाटतं, प्रत्येकाचा वैयक्तिक प्रश्न आहे. कारण गजानन नावाचा माणूस गुन्हेगार असू शकत नाही का? तर तसं नाहीये. गजानन नावाचे देखील गुन्हेगार असतात. मनोज, राजन नावाचे देखील गुन्हेगार होऊन गेलेत. नावात काहीच नसतं, तुम्ही घरी संस्कार काय करता? त्यावर सर्व अवलंबून असतं."

"प्रत्येक गोष्ट धर्माकडे आणि जातीकडे न्यायची असेल तर, या मनोवृत्तीबद्दल मी काही बोलणार नाही. या गोष्टीला विरोधही करणार नाही आणि पाठिंबा देखील देणार नाही. मी याबाबत न्यूट्रल आहे. चिन्मय आणि नेहा हे दोघे ही गोष्ट हँडल करण्यासाठी मॅच्युअर आहेत. मला या गोष्टीला सामोर जावं लागलं नाही कारण माझं नाव जेव्हा ठेवलं गेलं तेव्हा धार्मिक भावना फार बोथट नव्हत्या. माझ्या नावाचा सुलतान वैगरे नव्हता, म्हणजे इतिहासात अजून कोणी सापडलं नाही, जर असेल तर मलाही ट्रोल केलं जाईल.", असंही अस्तादनं मुलाखतीत सांगितलं.