पुणे : नोटाबंदीवेळी चलनातील जुन्या नोटा बँकेत बदलून घेत असताना सहा लाख रूपयांच्या बनावट नोटा जमा करत एका बँकेची फसवणूक करण्यात आली. टिळक रस्त्यावरील नोव्हेंबर 2016 मध्ये हा प्रकार घडला आहे. 

याप्रकरणी बॅंकेतर्फे रोहनकुमार सिंग ( रा बाणेर) यांनी स्वारगेट पोलीस ठाण्यात फिर्याद दिली असून त्यावरुन अनोळखी आरोपीविरुद्ध गुन्हा दाखल करण्यात आला आहे. फिर्यादी हे युनियन बँक ऑफ इंडियाच्या टिळक रस्ता शाखेत व्यवस्थापक म्हणून नोकरी करतात. नोव्हेंबर 2016 मध्ये त्यांच्या शाखेत एका ग्राहकाने चलनातून बाद झालेल्या जुन्या एक हजार रूपयांच्या नोटा आणि पाचशे रूपयांच्या नोटा अशा एकुण 5 लाख 94 हजार रूपये बँकेत जमा केले.

दरम्यान, या कालावधीत शाखेत जमा झालेली सहाशे कोटी रूपयांची रक्कम बदलापूर येथील आरबीआयच्या नोटा छपाई कारखान्यात पाठवून देण्यात आली. तेथे नोटांची तपासणी करीत असताना एका ग्राहकाने भरलेल्या नोटा बनावट असल्याचे निदर्शनास आले.

दरम्यान, याप्रकरणी रोहनकुमार यांनी रक्कम जमा केलेल्या ग्राहकाविरोधात तक्रार दिली आहे. या प्रकरणाचा तपास पोलीस हवालदार डी.आर.गभाले करीत आहेत.