ओतूर - नगर-कल्याण महामार्गावर उदापूर (ता. जुन्नर) गावच्या हद्दीत मॉर्निंग वॉकला गेलेल्‍या तीन मैत्रिणींचा वाहनाने धडक दिल्याने जागीच मृत्यू झाला. मीराबाई सुदाम ढमाले (वय ६५), कमल महादू ढमाले (वय ६७) व चांगुणाबाई बबन गायकर (वय ६५) यांचा मृतांत समावेश आहे. 

गेल्या सहा ते सात वर्षांपासून त्या तिघी दररोज नगर-कल्याण महामार्गावर अहिनवे वाडीफाटा ते उदापूर दरम्यान मॉर्निंग वॉक करत होत्या. बुधवारी सकाळी पावणेसहाच्या सुमारास अपघात झाला. मृतांमध्ये ओतूर-पिंपरी पेंढार जिल्हा परिषद गटाचे सदस्य मोहित ढमाले यांच्या मातुःश्रींचा समावेश आहे.

ओतूर पोलिस ठाण्याचे सहायक पोलिस निरीक्षक रमेश खुणे यांनी सांगितले की, पुणे मोशी येथून कल्याणकडे चाललेला नवीन हायवा चासीने उदापूरजवळ वरील तीन महिलांना धडक दिली. अपघातानंतर चालक पसार झाला.  फरार झालेल्या गाडी चालकाचा शोध घेण्यासाठी ओतूर पोलिसांचे पथक व ओतूरमधील युवकांनी एकत्रित महामार्गावरील विविध ठिकाणाचे सीसीटीव्ही फुटेज तपासणीसाठी रवाना केले गेले. त्यानुसार टाटा हायवा व चालक रियाज मुनिझर हसन रझा (रा. शिवराजपूर अंतू, प्रतापगड, उत्तर प्रदेश) यास शहापूर (जि. ठाणे) येथून अटक केली व वाहन जप्त केले.