पुणे -  पीएमपी बसथांबा, बीआरटी मार्ग आणि डेपो परिसरातून अनधिकृतरीत्या प्रवासी पळविणाऱ्या 14 खासगी वाहनांवर कारवाई करण्यात आली आहे. वाहतूक पोलिस आणि पीएमपी यांनी संयुक्तपणे ही कारवाई केली. 

शहरामध्ये पीएमपीचे प्रवासी पळविण्याचे प्रकार घडत आहेत. प्रवासी पळविणाऱ्या वाहनांवर गेल्या काही दिवसांपासून पीएमपी प्रशासनाकडून नजर ठेवण्यात येत होती. तसेच, याकडे वाहतूक पोलिसांनी लक्ष देण्याची मागणी पीएमपीने केली होती. यानुसार वाहतूक विभागाने पीएमपीच्या मदतीने बसथांबा, बीआरटी मार्ग आणि डेपो परिसरातील प्रवासी पळविणाऱ्या 14 वाहनांवर कारवाई केली. डेपो आणि बसथांब्यांच्या परिसरातून खासगी वाहनचालक पीएमपीचे प्रवासी पळविण्याचा प्रकार शहरात घडत आहेत. त्यामुळे पीएमपीचे उत्पन्न घटत असून, फेऱ्या रद्द कराव्या लागत आहेत. या प्रकाराला आळा बसण्यासाठी ही कारवाई करण्यात आली. यापुढेदेखील ती सुरू राहील, असे प्रशासनाच्या वतीने सांगितले.