आळेफाटा (पुणे) : पुणे - नाशिक महामार्गावरील चाळकवाडी (पिंपळवंडी) येथील टोलनाका बंद करण्याचे जुन्नरचे आमदार शरद सोनवणे यांचे काल (ता.13) केलेले आंदोलन हा राजकीय स्टंट असून, त्यांनी त्यांचे अपयश लपवण्यासाठी पूर्णपणे राजकीय हेतूने केलेला हा केविलवाणा प्रयत्न आहे अशी टीका करून, येत्या रविवारी (ता. 15) राष्ट्रवादी कॉंग्रेसच्या वतीने चाळकवाडी टोलनाका बंद करण्याचे आंदोलन होणारच असा निर्धार राष्ट्रवादी युवक कॉंग्रेसचे प्रदेश उपाध्यक्ष अतुल बेनके यांनी याविषयी पत्रकार परिषदेत बोलताना व्यक्त केला.                  

राष्ट्रवादी कॉंग्रेसच्या वतीने येत्या रविवारी (ता.15) युवानेते अतुल बेनके यांच्या नेतृत्वाखाली होणाऱ्या चाळकवाडी टोलनाका बंद आंदोलनाच्या पार्श्वभूमीवर, आमदार शरद सोनवणे यांनी दोन दिवस आधीच आंदोलन करून चाळकवाडी टोलनाका बंद  केल्याने, राष्ट्रवादी कॉंग्रेसच्या वतीने याविषयी भूमिका स्पष्ट करण्यासाठी आळेफाटा येथे पत्रकार परिषदेचे आयोजन करण्यात आले होते. याप्रसंगी युवानेते अतुल बेनके, राष्ट्रवादी कॉंग्रेसचे तालुकाध्यक्ष व जिल्हा परिषद सदस्य पांडुरंग पवार, जिल्हा परिषदेतील राष्ट्रवादी काँग्रेसचे गटनेते शरद लेंडे, पंचायत समिती सदस्य शाम माळी आदी मान्यवर उपस्थित होते.

यावेळी बोलताना अतुल बेनके पुढे म्हणाले की, आमदार सोनवणे यांनी हा टोलनाका चालू - बंद करण्याचे प्रकार यापूर्वीही अनेक वेळा केले असल्याने त्यांची विश्वासार्हता राहिलेली नाही. राष्ट्रवादी कॉंग्रेसच्या वतीने रविवारी (ता.१५) होणाऱ्या आंदोलनात खेड, आंबेगाव, जुन्नर तालुक्यासह अनेक संस्था - संघटना सहभागी होणार आहेत. पुणे - नाशिक महामार्गावरील आळेफाटा ते पुणे दरम्यानच्या विविध बाह्यवळण रस्त्यासह रस्त्याची अपूर्ण कामे पूर्ण झाल्याशिवाय, तसेच प्रकल्पबाधित शेतकऱ्यांना नुकसानभरपाई व न्याय मिळाल्याशिवाय टोलनाका सुरु होऊ देणार नसल्याचेही अतुल बेनके यांनी यावेळी बोलताना स्पष्ट केले. यावेळी बोलताना पांडुरंग पवार यांनी लोकप्रतिनिधींनी कोणावरही वयक्तिक टीका करू नये असे मत व्यक्त केले. तर जनतेच्या प्रश्नांना न्याय मिळवून देण्यासाठी राष्ट्रवादी कॉंग्रेस सनदशीर मार्गाने आंदोलन करणार असल्याचे मत शरद लेंडे यांनी यावेळी बोलताना व्यक्त केले.