पुणे : कृषी आणि सहकारी संस्थांनी कृषी प्रक्रिया उत्पादनांच्या निर्यातीवर अधिक भर द्यावा. सहकारी संस्थांना निर्यातदारांशी जोडून पुरवठा साखळी सक्षम करण्यात यावी. त्यासाठी कृषी आणि प्रक्रिया अन्न उत्पादने निर्यात विकास प्राधिकरण (एपीडा), वैकुंठ मेहता नॅशनल इन्स्टिट्यूट ऑफ को-ऑप. मॅनेजमेंट (वॅम्निकॉम) यांच्यासह इतर संस्थांकडून प्रयत्न सुरू आहेत, अशी माहिती प्रशिक्षण कार्यक्रमात देण्यात आली.

कृषी व सहकारी क्षेत्राला बळकटी देण्यासाठी ‘अपेडा’, ‘वॅम्निकॉम’ आणि इंडियन इन्स्टिट्यूट ऑफ फॉरेन ट्रेडच्या वतीने सहकारी आणि कृषी निर्यात विपणन प्रशिक्षण कार्यक्रमाचे आयोजन करण्यात आले. याअंतर्गत पहिला प्रशिक्षण कार्यक्रम ३ ते ६ मार्चदरम्यान ‘वॅम्निकॉम’च्या कॅम्पसमध्ये पार पडला. अध्यक्षस्थानी सहकार मंत्रालयाचे सचिव डी. के. सिंग होते. ‘अपेडा’चे अध्यक्ष डॉ. एम. अंगमुथू, सचिव डॉ. सुधांशू, ‘आयआयएफटी’चे प्रा. आशीष पांडे, आणि ‘वॅम्निकॉम’च्या संचालिका डॉ. हेमा यादव आदी या वेळी उपस्थित होते.

सिंग म्हणाले, ‘‘संकलन केंद्रे, एकात्मिक पॅकहाऊस, रीफर व्हॅन अशा कापणीनंतरच्या पायाभूत सुविधा विकसित करणे आणि सहकारी संस्थांनी कृषी-निर्यातीतून त्यांचा परतावा सुनिश्चित करणे आवश्यक आहे.डॉ. अंगमुथू यांनी निर्यातीत ज्ञानाची देवाणघेवाण आणि गुणवत्ता पैलूंवर भर दिला. ते म्हणाले, पंतप्रधान नरेंद्र मोदी यांच्या ‘लोकल आणि स्थानिक गो ग्लोबल’ या आवाहनाच्या अनुषंगाने कृषी निर्यात आणि सहकार क्षेत्रातून शेतकऱ्यांचे उत्पन्न वाढवण्यासाठी अपेडा कृषी सहकारी संस्थांना साहाय्य करीत राहील.

‘एपीईडीए’ चे सचिव डॉ. सुधांशू यांनी निर्यात वाढविण्यासाठी सहकारी संस्थांना निर्यातदारांशी जोडण्यावर आणि अखंड पुरवठा साखळी सक्षम करण्यावर भर दिला. डॉ. यादव यांनी यांनी प्रक्रिया, विपणन आणि पाच ट्रिलियन डॉलरची अर्थव्यवस्था साध्य करण्यासाठी सहकारी संस्थांचे योगदान वाढविण्यावर भर दिला.या प्रशिक्षण कार्यक्रमात ११ राज्यांतील एकूण ३१ स्पर्धकांनी सहभाग घेतला. त्यात अमूल डेअरी, नाफेड, ओमफेड, नागरी सहकारी बॅंका, साखर सहकारी संस्था अशा सहकारी संस्थांच्या प्रतिनिधींचा समावेश होता. सूत्रसंचालन सहायक प्राध्यापक डॉ. सागर वाडकर यांनी केले.