बारामती : विरोधी पक्षनेते अजित पवार यांचे सुरु असलेले काम राज्य व राष्ट्रवादी कॉंग्रेससाठी अतिशय उपयुक्त आहे, असे सांगत ज्येष्ठ नेते शरद पवार यांनी अजित पवार यांच्याच पाठीशी आपण खंबीरपणे आहोत, हे दाखवून दिले.

गेल्या काही दिवसात माध्यमांमधून अजित पवार यांच्याविषयी तसेच शरद पवार यांनी राष्ट्रवादीच्या दिलेल्या राजीनाम्याच्या पार्श्वभूमीवर राष्ट्रीय स्तरावर वेगवेगळी चर्चा झाली. या मध्ये संबंध ताणले गेल्यापर्यंत अनेकांनी निष्कर्ष काढले होते. मात्र ज्येष्ठ नेते शरद पवार यांनी आज अतिशय स्पष्टपणे अशा चर्चा निरर्थक असून त्या आता थांबवा असे आवाहन केले.

बारामतीत माध्यमांशी बोलतांना त्यांनी अतिशय स्पष्टपणे अजित पवार यांच्या विषयी विविध चर्चा थांबवा असे आवाहन केले. या वेळी बोलताना पवार म्हणाले, चर्चा होतात हे खर असले तरी कधी काय घडल आहे का, असा प्रतिप्रश्न करत पवार यांनी या चर्चा निरर्थक असल्याचे नमूद केले. अजित पवार व आपली कामाची पध्दत वेगळी आहे असे सांगताना मला वेळ असेल तेव्हा मी मिडीयाला वेळ देतो,

अजित पवार मिडीया फ्रेंडली नाही हे मी तुम्हाला स्वच्छ सांगतो, काही जण नावासाठी काम करतात अजित पवार यांना प्रसिध्दीची कधीच चिंता नसते, ते हातात घेतलेले काम पूर्ण करण्यावर भर देतात, फिल्डवर कामाचा त्यांचा अँप्रोच आहे, अजित पवार हे फक्त कामच करणा-यांपैकी एक आहेत. स्वताः शरद पवार यांनीच अत्यंत स्पष्टपणे अजित पवार यांच्या बाबत भूमिका स्पष्ट केल्याने आता तरी माध्यमातून येणा-या बातम्या थांबतील, अशी राष्ट्रवादीच्या कार्यकर्त्यांमध्ये चर्चा होती.