नुकसान भरपाई देण्याची शेतकऱ्यांकडून मागणी

मंचर  : आंबेगाव तालुक्‍याच्या आदिवासी भागातील 40 गावांत सलग 20 दिवस झालेल्या पावसामुळे 50 टक्के भात पीक सडले आहे. यामुळे 500 एकर क्षेत्रातील भातपिकाचे नुकसान झाल्याचा प्राथमिक अंदाज आहे. या नुकसानाचे पंचनामे करून शेतकऱ्यांना भरपाई द्यावी, अशी मागणी आंबेगाव पंचायत समितीचे सदस्य संजय गवारी यांनी केली आहे.

तालुक्‍यातील कोंढवळ, गवांदेवाडी, निगडाळे, राजपूर, तळेघर, म्हातारबाचीवाडी, चिखली, जांभोरी, तर आहुपे खोऱ्यातील तिरपाड, दिगज, अडिवरे, असाणे, पांचाळे, पाटण, माळीण, बोरघर, वचपे आदी गावांत नुकसानाचे प्रमाण मोठे आहे. सध्या पावसाचा जोर कमी झाला असला तरी अजूनही या भागात अधूनमधून सरी कोसळत आहेत. काही भागांत भातरोपे वाहून गेली आहेत, तर काही ठिकाणी भातपीक अजूनही पाण्यात आहे. शेतीचे बांधही पुराच्या पाण्याने वाहून गेले आहेत. अनेकांनी बॅंका व सहकारी सोसायट्यांकडून कर्ज घेतले होते. घेतलेले कर्ज कसे फेडायचे, या विवंचनेत असल्याचे शेतकरी वामन लोहकरे व हिरामण गायकवाड यांनी सांगितले.

निगडाळे, कोंढवळ भागातील शांताराम कारोटे, एकनाथ गेंगजे, गेनू लोहकरे, सुभाष मदगे, तुकाराम कुऱ्हाडे, चिंधू लोहकरे, मारुती लोहकरे, पंगाजी लोहकरे, काळू लोहकरे, विष्णू लांघी, शांताराम लोहकरे या शेतकऱ्यांच्या भातपिकाचे मोठ्या प्रमाणात नुकसान झाले आहे.