पुणे - वयाची साठी गाठलेल्या तरुणांनी आपल्या महाविद्यालयीन आठवणींना स्नेहसंमेलनाच्या निमित्ताने पुन्हा एकदा उजाळा दिला. १९७७ मध्ये गरवारे कॉमर्समधून बी. कॉम.ची पदवी घेतलेल्या सुमारे ५० हून अधिक मित्र-मैत्रिणींचे एक दिवसाचे स्नेहसंमेलन नुकतेच झाले. जंगली महाराज रस्त्याजवळील ‘क्‍लार्क्‍स इन्‌’ हॉटेलमध्ये हा कार्यक्रम झाला.

ताज्या बातम्यांसाठी डाऊनलोड करा ई-सकाळचे ऍप

कार्यक्रमासाठी मुंबई, ठाणे, सावंतवाडी, पाचगणी येथून मित्र मैत्रिणी एकत्र आले होते. काही जण सुमारे चाळीस वर्षांनंतर प्रथमच एकमेकांना भेटत होते. हिंदी गीतांच्या कार्यक्रमातून सूत्रसंचालन करणारे प्रसन्नकुमार भिडे यांनी कार्यक्रमाचे नियोजन केले होते. त्यांनी सादर केलेल्या ‘अमिताभ’च्या संवादांमुळे, सर्वांच्या डोळ्यापुढे दीवार चित्रपट उभा राहिला. सुनीता देव यांनी पु. लं.च्या पुस्तकातील नाट्यछटेचा काही भाग सादर केला. 

कुंदा पानसे यांचे शास्त्रीय गीतगायन, तर श्रीरंग रानडे, रमेश महाजन, सुनीता देव यांची हिंदी मराठी गीते यामुळे सर्वांनाच जुन्या काळात नेले. उत्कृष्ट पोषाखाबद्दलची खास बक्षिसे नंदकिशोर पोरे व मुग्धा जोशी यांनी पटकावली. कार्यक्रमाचे नियोजन प्रसन्न भिडे, अजित धर्मे, कुमार पारखी, मुकुंद खुस्तले, सुनीता देव आणि उषा सोमण यांनी केले होते.