पुणे : महापालिका, जिल्हा प्रशासन आणि शेतकऱ्यांमध्ये समाधानकारक चर्चा झाल्याने रखडलेल्या भामा आसखेड प्रकल्पाचे काम सुरू झाले असून, येत्या डिसेंबरपर्यंत हे काम पूर्ण करण्यात येणार आहे. त्याबाबत संबंधित ठेकेदाराला सूचना करण्यात आली आहे. तसेच, कामात अडथळे येऊ नयेत, यासाठी राज्य राखीव दलाचे पथक नेमण्यात आले आहे. दरम्यान, शेतकऱ्यांच्या मागण्यांबाबत सकारात्मक निर्णय घेण्यात येईल, असे महापालिका प्रशासनाने स्पष्ट केले आहे. 

शहराच्या पूर्व भागाला पाणीपुरवठा करण्यासाठी आखलेल्या भामा आसखेड प्रकल्पाचे बंद पडलेले काम आता पुन्हा सुरू करण्यात आले आहे. गेल्या वर्षी हे काम पूर्ण होणे अपेक्षित होते. मात्र, शेतकऱ्यांच्या आंदोलनामुळे ते थांबले होते.

राज्य सरकारच्या पातळीवर दोनदा चर्चा होऊनही शेतकऱ्यांनी जलवाहिनी आणि जॅकवेलचे काम रोखले होते. राज्य सरकार आणि संबंधित यंत्रणा मागण्यांकडे दुर्लक्ष करीत असल्याचे सांगून शेतकऱ्यांनी दहा दिवसांपूर्वी पुन्हा आंदोलन केले होते. मात्र, महापालिका आयुक्त सौरभ राव आणि आंदोलनकर्त्यांच्या बैठकीनंतर जलवाहिनीचे काम सुरू आहे.

या पार्श्‍वभूमीवर महापालिकेच्या अतिरिक्त आयुक्त शीतल उगले यांच्यासह अधिकाऱ्यांनी प्रकल्पाच्या कामांची शुक्रवारी पाहणी केली. तेव्हा जलवाहिनी, जॅकवेलच्या कामासह संभाव्य अडचणी आणि त्यावरील उपायांचा आढावा घेण्यात आला. प्रकल्पग्रस्त शेतकऱ्यांशीही त्यांनी चर्चा केल्याचे सांगण्यात आले. 

उगले म्हणाल्या, ''जलवाहिनी आणि धरणाच्या परिसरातील जॅकवेलचे बहुतांश काम झाले आहे. उर्वरित कामे वेळेत करण्याच्या सूचना संबंधितांना केल्या आहेत. ज्यामुळे पावसाळा सुरू होण्याआधी कामे पूर्ण होणार आहेत. या प्रकल्पांतर्गत कामांना मुदतवाढ देण्यात आली असून, त्यानुसार ती डिसेंबर 2018 पर्यंत पूर्ण करण्यात येतील. दरम्यानच्या काळात, शेतकऱ्यांच्या मागण्यांबाबत तोडगा काढला जाईल.'' 

दीड महिन्यात काम पूर्णत्वाकडे 
भामा आसखेड धरण परिसरातील जॅकवेलचे (पंपिंग हाउस) काम आता सुरू झाले असले, तरी प्रत्यक्ष काम सुरू असलेल्या भागात पाणी साचत असल्याने त्यात अडथळे येत आहेत. दुसरीकडे, पावसाळ्यात हे काम करणे शक्‍य नसल्याने ते वेळेत करण्याचा प्रयत्न असल्याचे तेथील अधिकाऱ्यांनी सांगितले. पुढील दीड महिन्यात बहुतांश काम पूर्ण केले जाईल, असेही सांगण्यात आले.