पिंपरी - बीएसएनएलचे ५० लाखांचे वीजदेयक थकल्याने महावितरणने वीजपुरवठा खंडित केला. चिंचवड येथील काकडे पार्क परिसरातील सुमारे दोन हजार नागरिकांच्या दूरध्वनी आणि इंटरनेटसेवेला पंधरवड्यापासून फटका बसला आहे. त्यामुळे ग्राहकांनी नाराजी व्यक्त केली. 

बीएसएनएलचे चिंचवड परिसरात सुमारे २५ हजार ग्राहक आहेत. बीएसएनएलने महावितरणचे वीजबिल वेळेत भरले नाही. त्यामुळे गेले १५ दिवस जनरेटरद्वारे दूरध्वनी आणि इंटरनेटसेवा सुरू आहे. मात्र, जनरेटर सुरू असेपर्यंतच ही सेवा सुरू असते. जनरेटर बंद झाल्यावर सेवा पुन्हा खंडित होते. काकडे पार्क परिसरातील ग्राहकांना याचा सर्वाधिक त्रास होत आहे. या भागातील नागरिकांनी याबाबत बीएसएनएलकडे अनेक तक्रारी केल्या. परंतु, नेहमीच या सेवा खंडित होत असल्याने ग्राहकांनी तीव्र नाराजी व्यक्त केली.  

यासंदर्भात ग्राहक अजय जगताप यांनी सांगितले, की बीएसएनएलकडून ग्राहकांना मिळणाऱ्या सेवेत नेहमीच काही ना काही कारणाने व्यत्यय येत असतो. याबाबत संबंधित कर्मचाऱ्यांकडे विचारणा केल्यावर समाधानकारक उत्तरे मिळत नाहीत.

आमच्याकडे वीजबिलाचे पैसे देण्यासाठी निधी उपलब्ध नव्हता. त्यामुळे काही दिवस सेवा खंडित झाली होती. मात्र, महावितरण कंपनीच्या थकीत वीजबिलापैकी काही रक्कम भरली आहे. उर्वरित रक्कम एक-दोन दिवसांत भरण्यात येईल.
- एच. महंतेश, उपसरव्यवस्थापक, बीएसएनएल, चिंचवड विभाग