पुणे - खेळताना चुकून लिफ्टमध्ये अडकल्यामुळे गंभीर जखमी झालेल्या पाच वर्षीय चिमुरडीची अग्निशामक दलाचे जवान व स्थानिक नागरिकांनी सुटका केली. मात्र उपचारापूर्वीच तिचा दुर्दैवी मृत्यू झाला. घोरपडी पेठेतील सोसायटीत शनिवारी सायंकाळी साडेपाच वाजता ही दुर्घटना घडली.

नशरा रहेमान खान (वय ५) असे मृत मुलीचे नाव आहे. पोलिसांनी दिलेल्या माहितीनुसार, घोरपडी पेठेत झोरा कॉम्पलेक्‍स ही आठ मजली इमारत आहे. येथे नशराची आजी राहते. नशरा आई-वडिलांसह आजीकडे आली होती. नशराचे कुटुंबीय घरात होते. त्या वेळी नशरा खेळताना लिफ्टमध्ये गेली. त्या वेळी लिफ्ट चौथ्या मजल्यावर जात होती. लिफ्ट व चौथ्या मजल्यावरील भिंतीमध्ये अडकून ती गंभीर जखमी झाली. दरम्यान, नशरा दिसत नसल्यामुळे पालकांनी शोध घेतला. त्यानंतर नशरा लिफ्टमध्ये अडकल्याचे सोसायटीतील लोकांच्या निदर्शनास आले. रहिवाशांनी तत्काळ अग्निशामक दलास बोलाविले व रहिवाशांनी तिला काढण्याचा प्रयत्न केला. दरम्यान, अग्निशामक दलाचे जवान व नागरिकांनी प्रयत्न करून तिला बाहेर काढले. नशराला तत्काळ उपचारासाठी ससून रुग्णालयात हलविले. मात्र, उपचारांपूर्वीच तिचा मृत्यू झाल्याचे डॉक्‍टरांनी घोषित केले.