पुणे - सावित्रीबाई फुले पुणे विद्यापीठाच्या वतीने कोरोनासंदर्भात खबरदारीचा उपाय म्हणून अनिश्‍चित काळासाठी शैक्षणिक विभागांचे अध्यापनाचे कामकाज बंद ठेवण्यात आले आहे. मात्र, प्रशासकीय आणि इतर कामकाज चालू राहणार आहे.

आता बातम्या ऐकण्यासाठी डाऊनलोड करा ई-सकाळचे ऍप 

विद्यापीठाच्या वतीने यासंबंधीचे परिपत्रक शनिवारी काढण्यात आले. प्रतिबंधात्मक उपाय म्हणून जयकर ग्रंथालयासहित सर्व वाचन कक्ष, अभ्यागत निवास, कमवा व शिका योजना, व्यायामशाळा, सर्व क्रीडा सुविधा, पाळणाघर, उद्याने आणि अत्यावश्‍यक सेवा वगळून इतर वाहनसेवा बंद करण्यात आली आहे. विद्यापीठातील विद्यार्थ्यांना सुटीच्या काळात अनावश्‍यकरीत्या फिरण्यास मनाई करण्यात आली आहे. विद्यार्थी फिरताना दिसल्यास त्यांना मूळ गावी जाण्याची सूचना देण्यात येईल, असे प्रशासनाने कळविले आहे.

नागरिकांना प्रवेशास बंदी 
विद्यापीठात विनापरवानगी येणाऱ्या अभ्यागतांना या कालावधीत प्रवेश देण्यात येणार नाही. तसेच, सकाळी आणि संध्याकाळी व्यायाम आणि फिरण्यासाठी येणाऱ्या नागरिकांना प्रवेश बंद करण्यात आला आहे. विद्यापीठातील विद्यार्थी, कर्मचारी, त्यांचे नातेवाईक यांना ओळखपत्र पाहूनच प्रवेश देण्यात येईल, असे प्रशासनाने म्हटले आहे. या काळात प्रवेशद्वारावरील बायोमेट्रिक सुविधा बंद राहील.

शहरातील महाविद्यालयांत शुकशुकाट
राज्य सरकारने शाळा, महाविद्यालये, जिम, चित्रपटगृहे, जलतरण तलाव बंद करण्याचा निर्णय घेतला आहे. त्यामुळे शहरात आज सगळीकडे शुकशुकाट जाणवला. विशेषतः महाविद्यालयीन विद्यार्थ्यांनी नेहमी गजबजणाऱ्या सेनापती बापट रस्ता, फर्ग्युसन महाविद्यालय रस्ता, टिळक रस्ता आदी ठिकाणी गर्दी कमी होती. महाविद्यालयांची आवारे, संकुले, वाचन कक्ष यांसह शहराच्या मध्यवर्ती भागात असलेल्या खासगी अभ्यासिकांमध्ये आज शुकशुकाट होता. काही क्‍लासचालकांनी विद्यार्थ्यांना आठवडाभराची सुटी जाहीर केली आहे. आठवडाभरानंतर परिस्थितीचा आढावा घेऊन पुढील निर्णय घेण्यात येईल, असे क्‍लासचालकांच्या वतीने सांगण्यात आले.