औंध (पुणे) : कोरोनाचा प्रादुर्भाव पुणे शहरात सुरु झाल्यानंतर बोपोडी येथील कै. द्रौपदाबाई खेडेकर रुग्णालयातील डॉक्टर, परिचारिकांसह सर्व कर्मचारी रुग्णांची अविरत सेवा करत आहेत. घरच्या जबाबदा-या सांभाळत रुग्णालयात रुग्णांची सेवा करतांना कुठलीही तक्रार न करणाऱ्या  डॉक्टर, सर्व परिचारिका, मावशी यांनी केलेले काम उल्लेखनीय असेच आहे. दिवस- रात्र कार्यरत असलेला कर्मचारी वर्ग कुठल्याही सुट्टी व रजेची अपेक्षा न करता सतत कार्यरत आहे.

शिवराज्याभिषेक दिन ऑनलाइन; ३२ देशांतील मराठी बांधव सहभागी

केवळ वैद्यकीय सेवाच नाही तर येथे दाखल झालेल्या रुग्णांना मानसिक आधार देण्याचे कामही येथील डॉक्टर,  कर्मचारी करत आहेत. यामुळे येथील रुग्णांना घरच्या सारखा मानसिक आधार मिळतो आहे. त्याचप्रमाणे योग्य औषधोपचार, तपासणी व जेवणाची वेळच्यावेळी सोय केली जात असल्याने रुग्णांना घरच्यासारखी सेवा मिळत आहे. याचे त्या रुग्णांच्या कुटुंबियांनाही समाधान मिळते. रुग्णालयातील काही कर्मचारी सेवानिवृत्तीच्या जवळ असतानाही वयाचा कुठलाही बाऊ न करता मनापासून रुग्णांची सेवा करताहेत.

- 'कम्युनिटी ट्रान्समिशन'बाबत आरोग्य मंत्रालयाने काय केलाय दावा? वाचा सविस्तर

कोरोनाचे उपचार केंद्र सुरु झाल्यापासून ते आजपर्यंत सर्वच रुग्णांची दिवसातून तीन वेळा तपासणी करुन त्यांना वेळोवेळी डॉक्टरांकडून सल्ला दिला जात आहे. राष्ट्रीय आपत्ती असल्याने आपली कर्तव्य भावना जपत सर्वजण मनापासून  काम करत आहेत. सुरुवातीला या रुग्णालयात १९ मार्चपासून रुग्णांना क्वारंटाईन करायला सुरुवात झाली होती. परंतु रुग्ण संख्या वाढून इतर रुग्णालयात जागा कमी पडू लागल्याने १४ एप्रिल पासून प्रत्यक्ष  रुग्णांना येथे दाखल करण्यास सुरुवात झाली होती. तेव्हापासून ते आजपर्यंत साडेतीन हजाराहून अधिक स्वॅब तपासणी केली गेली आहे. तर आजपर्यंत १९४ रुग्ण बरे होऊन घरी गेले आहेत तर पन्नास रुग्णांवर सध्या उपचार सुरू आहेत.

पुण्याच्या बातम्या वाचण्यासाठी येथे  क्लिक करा

येथील वैद्यकीय अधिकारी डॉ. स्वाती बढिये यांच्यासह डॉ. वैशाली ब्रम्हे, डॉ. ललित पाटील, डॉ. निलिमा चौधरी व डॉ. आत्मिका नायर यांनी या रुग्णालयात तपासणीपासून ते रुग्णांना डिस्चार्ज मिळेपर्यंत जबाबदारीने सेवा दिली आहे. याबरोबरच परिचारिका, प्रयोगशाळा तंत्रज्ञ, फार्मासिस्ट, डाटा एंट्री आॅपरेटर, इतर मदतनीस, सुरक्षारक्षक, सफाई कामगार, रक्त तपासणीस यांचाही यात मोलाचे कार्य आहे. पुणे शहरातील कोरोना रुग्णांचा आकडा वाढत होता. तेव्हापासून येथील सर्वांनी सुरु केलेले कर्तव्य आजही अविरत सुरुच आहे. औंध क्षेत्रिय कार्यालयांतर्गत असलेल्या या रुग्णालयात सुविधा उपलब्ध करुन देण्यासाठी सहाय्यक आयुक्त जयदीप पवार यांनी मोलाचे सहकार्य केल्याचे डॉ. स्वाती बढिये यांनी यावेळी बोलताना सांगितले. 

- 'यहाँ के हम सिकंदर'; सलग चौथ्या वर्षी पुणे विद्यापीठ देशातील 'टॉप-10' विद्यापीठांच्या यादीत!

 

येथील सर्व डॉक्टर, कर्मचा-यांनी प्रत्येक रुग्णाला योग्य ती सेवा देत आपली जबाबदारी पार पाडली आहे. आपल्या समस्यांचा कुठलाही बाऊ न करता प्रत्येकाने स्वतःला कामात वाहून घेतले आहे. जवळपास तीन महिन्यात सर्वांनी केलेल्या कामाच्या बळावर रुग्णांना योग्य सेवा देत त्यांना बरे करण्यात यशस्वी ठरल्याने सर्व कर्मचा-यांचा मला सार्थ अभिमान आहे.

-डॉ. स्वाती बढिये, वैद्यकीय अधिकारी