पुणे - निवडणुकीच्या धामधुमीत गेले दीड ते दोन महिने काँग्रेस भवनात उत्साहाचे वातावरण होते. मात्र मतमोजणी सुरू झाल्यानंतर पक्षाच्या उमेदवाराचा पराभव दिसू लागल्याने परिसरात शुकशुकाट व निराशाचे वातावरण पसरल्याचे पाहायला मिळाले. पुण्यातच काय, राज्यातील अन्य ठिकाणीदेखील पक्षाच्या विजयाची चिन्हे दिसत नसल्याने कार्यकर्त्यांमध्ये निरुत्साह होता. 

निवडणुकीचा निकाल ऐकण्यासाठी सकाळी काँग्रेस भवनात कार्यकर्त्यांची गर्दी झाली होती. मात्र मतमोजणी जसजशी पुढे सरकली, तसतसे कार्यकर्ते निरुत्साही होऊन भवनामधून बाहेर पडतानाचे चित्र दिसून आले. कार्यालयात तुरळक कार्यकर्त्यांची ये-जा सोडली, तर दिवसभर कोणीही या ठिकाणी फिरकले नाही. 

शहरातील पक्षाच्या नेत्यांनीदेखील इकडे पाठ फिरवल्याचे दिसून आले. कार्यालयाच्या आवारात तीन-चार गाड्या आणि तुरळक कार्यकर्ते 
असे चित्र दिवसभर पाहावयास मिळाले.

मतमोजणीत काँग्रेसचे उमेदवार मोहन जोशी पहिल्या फेरीपासूनच पीछाडीवर गेल्याने काँग्रेस कार्यकर्त्यांमध्ये नाराजी दिसून आली. पराभवाची चाहूल लागल्याने सकाळपासून पक्षाच्या नेत्यांनी कार्यालयात येण्याचे टाळले. मतमोजणीच्या सुरवातीच्या काही फेऱ्यांमध्ये काँग्रेसचे उमेदवार पीछाडीवर गेल्याने सकाळी काँग्रेस भवनामध्ये आलेले काही कार्यकर्तेही दुपारनंतर निघून गेल्याने दुपारनंतर कार्यालयामध्ये पाच-दहा कार्यकर्त्यांव्यतिरिक्त कोणीही दिसले नाही. राज्य आणि देशपातळीवर काँग्रेसला अपेक्षित यश मिळताना दिसत नसल्याने कार्यकर्ते नाराज दिसून आले. 

याबाबत काँग्रेसचे कार्यकर्ते सनमीतसिंग चौधरी म्हणाले, ‘‘निवडणुकीचे निकाल धक्कादायक आहेत. अशा निकालाची अपेक्षा नव्हती. पक्षाची पुनर्बांधणी करून नवीन दमाच्या कार्यकर्त्यांना संधी दिली पाहिजे. शहरामध्ये पक्षाला सक्षम नेतृत्वाची गरज आहे.’’