पुणे : महाराष्ट्राचं लाडकं व्यक्तिमत्व असलेले लेखक आणि अष्टपैलू कलावंत, ज्यांच्या निखळ विनोदांनी अनेक दशकं लहान-थोर साऱ्यांनाच हसवलं.. आजही ज्यांच्या साहित्यकृती वाचून मन प्रफुल्लित होतं.. असे पुलं.. अर्थात पुरुषोत्तम लक्ष्मण देशपांडे यांचे जन्मशताब्दी वर्ष उद्यापासून सुरू होत आहे. 8 नोव्हेंबर हा पुलंचा जन्मदिवस.

उद्यापासून सुरू होणाऱ्या या जन्मशताब्दीनिमित्त साहित्यवेध प्रतिष्ठान आणि संवाद संस्थेने पुलंच्या दुर्मिळ छायाचित्रांचे व पुलंच्या आयुष्यावर विविध व्यंगचित्रकारांनी काढलेल्या व्यंगचित्रांचे प्रदर्शन आयोजित केले आहे. आज ज्येष्ठ व्यंगचित्रकार शि. द. फडणीस, व्यंगचित्रकार आलोक निरंतर, लेखक डॉ. श्रीपाल सबनीस यांच्या उपस्थितीत या छायाचित्र- चित्र प्रदर्शनाचे उद्घाटन पार पडले. पुलंच्या व्यक्तिमत्वाची, आयुष्याची चित्ररूपाने ओळख करून देणारे हे प्रदर्शन आहे.

विविध साहित्यिक, कलाकारांसोबतचे पुलंचे दुर्मिळ छायाचित्रे, गायन-वादन करणारे पुलं, पत्नी सुनीताबाई यांच्यासोबत टिपलेले खास क्षण या प्रदर्शनात पाहता येणार आहे. अनेक व्यंगचित्रकारांनी पुलंच्या साहित्यातील गाजलेल्या व्यक्तिरेखा, गाजलेली वाक्ये, विनोद यावर आधारित काढलेली व्यंगचित्रे हे प्रदर्शनाचे आणखी एक वैशिष्ट्य. 
अनेक नागरिकांनी आज हे प्रदर्शन पाहण्यासाठी गर्दी केली होती. कोथरूड येथील यशवंतराव चव्हाण नाट्यगृहातील सभागृहात हे प्रदर्शन 9 नोव्हेंबरपर्यंत सकाळी 11 ते सायंकाळी 6 या वेळेत सर्वांना पाहण्यासाठी खुले असणार आहे.