पुणे - अनुवादाच्या माध्यमातून मराठी आणि कन्नडभाषेचा शब्दबंध घट्ट करणारे ज्येष्ठ अनुवादक विरूपाक्ष कुलकर्णी (वय ८१) यांचे शुक्रवारी (ता.१६) निधन झाले. त्यांच्या मागे पत्नी ज्येष्ठ अनुवादिका उमा कुलकर्णी या आहेत.

मराठीतील साहित्यकृती कन्नडमध्ये अनुवाद विरुपाक्ष करत होते. कुलकर्णी दांपत्य चार दिवसांपूर्वीच काश्मीर येथून पुण्यात परतले होते. त्यानंतर विरूपाक्ष यांना त्रास होऊ लागल्याने ते गृह विलगीकरणात होते. नंतर त्यांना रूग्णालयात दाखल करण्यात आले. पण उपचारादरम्यान त्यांची प्राणज्योत मावळली. विरुपाक्ष यांनी संरक्षण खात्याच्या उच्च क्षमता स्फोटके कारखाण्यात इलेक्ट्रिकल अभियंता म्हणून अनेक वर्षे काम केले. वाचन आणि लिखाणाच्या आवडीतून कुलकर्णी दाम्पत्याने अनुवादाच्या क्षेत्रात स्वतःला झोकून देऊन काम केले. विरुपाक्ष यांनी मराठीतील साहित्य कन्नडमध्ये अनुवादीत केले तर उमा कुलकर्णी यांनी कन्नड साहित्य मराठी भाषेत आनले. स्वातंत्र्यवीर विनायक दामोदर सावरकर यांच्या जन्मशताब्दीनिमित्त ‘माझी जन्मठेप’ हे पुस्तक विरुपाक्ष यांनी अनुवादीत करत अनुवादाच्या क्षेत्रात आपले पहिले पाऊल टाकले. आजवर त्यांनी २० पुस्तकांचा कन्नडमध्ये अनुवाद केला आहे. ज्यामध्ये सुनिता देशपांडे यांचे ‘आहे मनोहर तरी’, ‘भैरप्पा-कारंथ लेखन समीक्षा’, विश्वनाथ खैरे यांचे मिथ्यांचा मागोवा आदी साहित्यकृतींचा समावेश आहे. तसेच पु.ल.देशपांडे व डॉ. बाबासाहेब आंबेडकर यांचे साहित्य आणि बाबा आमटे यांचे चरित्रही त्यांनी मराठीतून कन्नडमध्ये अनुवादीत केले आहे.