पुणे - मोटारीसमोर आलेल्या दुचाकीस्वारास थांबण्यास सांगितले. त्यामुळे संतप्त झालेल्या दुचाकीस्वाराने त्याच्या साथीदारासह चालकास जबर मारहाण केली. दरम्यान, मोटारचालकाला वाचविण्यासाठी त्याच्या चुलत भावाने त्याच्याकडील पिस्तुलातून हवेत गोळीबार केला. कोंढवा परिसरात शुक्रवारी रात्री साडेआठ वाजता ही घटना घडली.

सुफियान रफीक खान (वय ३३, रा. कौसरबाग, कोंढवा), उबेद सईद खान (वय ३०, रा.  रविवार पेठ), अब्दुल रजा शेख (वय २८, रा. क्‍लाऊड नाईन सोसायटी, कोंढवा), अशी अटक केलेल्या आरोपींची नावे आहेत. याप्रकरणी अब्दुला दुराज गोरे ( वय १९, रा. कोंढवा खुर्द) यांनी कोंढवा ठाण्यात 
फिर्याद दिली. 

पोलिस निरीक्षक अनिल पाटील यांनी दिलेल्या माहितीनुसार, गोरे हे शुक्रवारी मोटारीतून जात होते. कोणार्क सोसायटीजवळ वळणावर त्यांच्यासमोर दुचाकीस्वार आला. त्यास थांबण्यास सांगितले. त्याचा राग आल्याने त्याने दुचाकीवरून उतरुन फिर्यादी यांना हेल्मेटने मारहाण करण्यास सुरवात केली. त्यानंतर दुचाकीस्वाराने त्याच्या दोन साथीदारांना बोलावले. 

फिर्यादी यांना लोखंडी बारने मारण्यास सुरवात केली. त्या वेळी फिर्यादी जीव वाचविण्यासाठी जवळच राहणाऱ्या त्यांचा चुलत भाऊ हसन समीर गोरे याच्या सोसायटीत गेले. तेव्हा हसन गोरे यांनी तिघांना समजाविण्याचा प्रयत्न केला. त्यानंतरही तिघांनी अब्दुर गोरे यांना मारहाण सुरूच ठेवली. 
दरम्यान, हसन गोरे यांनी मारहाण करणाऱ्या आरोपींना रोखण्यासाठी पिस्तूल काढले. परंतु, आरोपींनी त्यांचे ऐकले नाही. भावाचा जीव वाचविण्यासाठी त्यांनी हवेत गोळीबार केला. त्यानंतर तिन्ही आरोपी पळून गेले.