पिंपरी : बनावट पिस्तुल व कोयत्याचा धाक दाखवून ट्रकचालकाकडील ऐवज लुटून पसार झालेल्या रावण टोळीतील पाच जणांना निगडी पोलिसांनी अटक केली. 

अविनाश दिलीप शेलार (वय 19, रा. मोरया कॉलनी, वाल्हेकरवाडी, चिंचवड), स्वप्नील उर्फ बबलु शिवाजी वाघमारे (वय 22, रा. भोंडवेवस्ती, ओमसाई कॉलनी, चिंचवड), नरेश शंकर चव्हाण (वय 19, रा. जिजामाता चौक, वाल्हेकरवाडी, चिंचवड), सुर्यकांत सुनिल फुले (वय 19, रा. भोंडवेवस्ती, चिंचवड), किरण शिवाजी खवळे (वय 20, रा. भिमाई हौसिंग सोसायटी, ओटास्किम, निगडी) अशी अटक केलेल्यांची नावे आहेत. तर एक अल्पवयीन ताब्यात आहे.

11 ऑगस्टला (रविवार) निगडीतील ट्रान्सपोर्टनगर येथे ट्रकचालक अवतार मेजर सिंग मुक्कामी थांबले होते. त्यावेळी दुचाकीवरुन आलेल्या आरोपींनी सिंग यांना कोयत्याने बेदम मारहाण करीत त्यांच्याकडील ऐवज लुटला. तसेच त्यांच्या इतर सहकाऱ्यांनाही कोयत्याचा धाक दाखवून दमदाटी केली. याप्रकरणी निगडी पोलिस ठाण्यात गुन्हा दाखल झाला. दरम्यान, यातील आरोपी रावण टोळीचे असल्याची माहिती मिळाली.

पोलिस आरोपींचा शोध घेत असताना आकुर्डी रेल्वेस्थानकासमोरील रस्त्यावरुन दोघेजण दुचाकीवरुन संशयितरित्या दिसून आले. त्यांना पकडून कसून चौकशी केली असता त्यांनी गुन्हा केल्याची कबुली दिली. त्यानंतर इतर आरोपींची नावे समोर आली. तपासात हे आरोपी बनावट पिस्तुलचा व कोयत्याचा धाक दाखवून गुन्हे करीत असल्याचे स्पष्ट झाले. आरोपींकडून दोन दुचाकी, एक बनावट पिस्तुल, तीन कोयते व तेराशे रुपयांची रोकड असा 42 हजार 500 रुपयांचा ऐवज जप्त केला. पाच आरोपींना अटक केली असून त्यांना 18 ऑगस्टपर्यंत पोलिस कोठडी सुनावली आहे. तर एका अल्पवयीन मुलगा ताब्यात घेतले आहे.