जुन्नर - जुन्नर शहर परिसरात नागरी वस्तीत संचार करणारा चौथा बिबट्या पिंजऱ्यात जेरबंद करण्यात वन विभागाला यश आले आहे, अशी माहिती वनक्षेत्रपाल अजित शिंदे यांनी दिली.

शहरातील लोकवस्तीच्या भागात भर दिवसा देखील वारंवार बिबट्याचे दर्शन होत असल्याने नागरिकांमध्ये भीतीचे वातावरण निर्माण झाले होते. जुन्नर शहरातील आगरपेठ येथे दीड महिन्यात एकाच ठिकाणी तीन बिबटे जेरबंद करण्यात आले होते. त्यानंतर कल्याण पेठेतील नागरी वस्तीतील हा चौथा बिबटया जेरबंद झाला आहे.

कल्याण पेठेतील शिंदे यांचे शेत व नाल्याच्या झुडुपात बिबटया असल्याच्या तक्रारी परिसरातील नागरिकांनी केल्या होत्या. भर दिवसा बिबटया शेतात फिरत असताना दिसत होता. तर रात्रीच्या वेळी बिबट्याच्या डरकाळ्या कानी पडत होत्या. यामुळे वनविभागाने शनिवारी ता. २४ रोजी लावलेल्या पिंजऱ्यात आज रविवार ता. २५ रोजी बिबट्या जेरबंद झाला. पिंजरा लावल्यानंतर लगेचच बिबट्या त्यात अडकल्याने नागरिक व वनविभागाने सुटकेचा निश्वास टाकला.

जुन्नरचे वनपरिमंडळ अधिकारी नितीन विधाटे, वनरक्षक नारायण राठोड, संजय गायकवाड, स्वरूप रेगडे, तेजस्वीनी भालेकर, वनमजुर दादु जाधव, सतोष भालेकर, पंढरीनाथ भालेकर यांचे बिबट्या जेरबंद करण्याचे कामी सहकार्य झाले. पिंजऱ्यात सापडलेला नर बिबट्या दहा वर्षे वयाचा आहे. त्यास माणिकडोह निवारा केंद्रात पाठविण्यात आले असल्याचे वनपाल विधाटे यांनी सांगितले.