पुणे - जोडीदाराची गरज प्रत्येकाला असते, शारीरिक गरजांसाठी तसेच मानसिक पाठबळासाठीही. तसेच, एचआयव्हीसोबत जगणाऱ्या, जोडीदाराला गमावलेल्या, एकाकी पडलेल्या व्यक्तींना मानसिक आधाराचीही गरज भासते. मात्र, समाजापासून दुखणे दूर ठेवत असलेल्या एचआयव्हीबाधितांना जोडीदार शोधताना अनंत अडचणी येतात. त्यांची ही निकड लक्षात घेऊन वधू-वर परिचय मेळाव्याचे आयोजन गेल्या दहा वर्षांपासून दीपगृह सोसायटी संस्थेच्या दिशा प्रकल्पांतर्गत घेतले जात आहे. 

आत्तापर्यंत १३० एचआयव्ही संसर्ग झालेल्या जोडप्यांचे विवाह केले असल्याची माहिती दीपगृह संस्थेच्या दिशा प्रकल्पाचे प्रकल्प अधिकारी राजेंद्र आहेर यांनी दिली.

- 'सकाळ'चे मोबाईल ऍप डाऊनलोड करा

इथेल गार्डन येथे एचआयव्ही संसर्ग झालेल्या वधू-वर मेळाव्यात आहेर बोलत होते. या मेळाव्यात देशभरातील ३५० एचआयव्हीचा संसर्ग झालेल्या रुग्णांनी सहभाग घेतला. याप्रसंगी दीपगृह संस्थेच्या संचालिका आश्‍लेशा ओनावळे, शकुंतला कांबळे, माया कांबळे, लता माने, राजश्री साळवे, वैशाली साळवे उपस्थित होते. हा मेळावा यशस्वी करण्यासाठी टीजीआयएनई नर्सिंग कॉलेज, किर्लोस्कर न्यूमॅटिक कंपनी आणि इथेल गार्डन अध्यापक विद्यालयाचे मोलाचे सहकार्य लाभले. 

आहेर पुढे म्हणाले, एचआयव्ही संसर्ग झालेल्या रुग्णांना एआरटी उपचार दिले जातात. या औषधोपचारांमुळे एचआयव्ही संसर्गित लोकांचे आयुष्यमान वाढले असून, ते सामान्यांप्रमाणेच काम करू शकतात. मात्र, एचआयव्हीबद्दल आजही समाजात नकारात्मकतेची भावना आहे. त्यामुळे हा आजार असलेले रुग्ण समाजापासून वेगळे पडतात. काही वेळा या आजारात जोडीदार गमावला जातो. लहान वयात आजार झाल्याने पुढचे संपूर्ण आयुष्य एकट्याने काढावे लागते. त्यामुळे त्यांना जोडीदार शोधण्यास आमची संस्था काम करत आहे.

एचआयव्ही सहजीवन जगणाऱ्या व्यक्तींना सन्मानाने समाजाच्या मुख्य प्रवाहात आणून आयुष्याकडे बघण्याचा सकारात्मक दृष्टिकोन निर्माण करून एक सुखी, समृद्ध व आनंदी जीवन जगता यावे. यासाठी दीपगृह संस्था चांगला उपक्रम राबवित असल्याचे मत या मेळाव्यातील एचआयव्ही संसर्ग झालेल्या रुग्णांनी व्यक्त केले.