लोणावळा : येथील कुमार रिसॉर्टस्‌मधील वॉटरपार्कमध्ये फिरायला आलेल्या मुंबईतील एका आश्रमशाळेतील विद्यार्थिनीचा बुडून मृत्यू झाला. बुधवारी (ता. 15) दुपारी सव्वातीनच्या सुमारास ही घटना घडली. 

नीलू मलेश म्हेत्रे (वय 17, रा. मेगा मशिदीजवळ, अंधेरी पूर्व, मुंबई) असे मृत्यू झालेल्या मुलीचे नाव आहे. लोणावळा शहर पोलिसांनी दिलेल्या माहितीनुसार, अंधेरी पूर्व येथील स्नेहसदन आश्रमशाळेतील 87 मुले व मुली शाळेच्या बसने बुधवारी लोणावळ्यात फिरायला आले होते. त्यातील काही कुमार रिसॉर्टस्‌मधील वॉटरपार्कमध्ये पोहण्यासाठी उतरले. नीलू वॉटरपार्कच्या कडेला उभी होती. त्या वेळी अन्य विद्यार्थ्यांचा तिला धक्का लागला आणि ती पाण्यात पडली. बसचालक व रिसॉर्टस्‌मधील जीवरक्षकांने तिला तत्काळ बाहेर काढून नजीकच्या हॉस्पिटलमध्ये दाखल केले. मात्र, नीलूचा उपचारापूर्वीच मृत्यू झाल्याचे डॉक्‍टरांनी सांगितले.

घटनेची माहिती बसचालक फादर गोएल पॅट्रिक (वय 46, रा. अंधेरी, मुंबई) यांनी लोणावळा शहर पोलिसांना दिली. सहायक निरीक्षक बी. एस. सांगळे अधिक तपास करीत आहेत.