भोर, ता. १० : भाटघर धरणाच्या पाणलोट क्षेत्रात प्राचीन वास्तूकलेचे वैभव असलेल्या कांबरे बुद्रुक गावास अद्यापही पाणीयोजना मंजूर नाही. दूषित पाणी प्यावे लागत आहे. आरोग्य धोक्यात आल्याने नाराजी त्रस्त नागरिकांकडून संताप व्यक्त होत आहे. यामुळे ५०० लोकवस्ती असलेल्या गावास योजनेची प्रतीक्षा लागली आहे.

कांबरे गावात धरणाच्या पाणलोट क्षेत्रात कांबरेश्वराचे प्राचीन मंदिर आहे. केवळ उन्हाळ्यात केवळ चारच महिने पाण्याबाहेर येते. मंदिराशेजारी असलेल्या आडातून कांबरे ग्रामपंचायतीला पाणीपुरवठा केला जातो. परंतु उन्हाळ्यात धरणातील पाणीसाठा कमी झाल्यानंतर मंदिर उघडे पडते आणि आडातील पाणीसाठाही कमी होतो. ग्रामपंचायतीच्या वतीने मागील पंधरावड्यात आडातील गाळ काढून खोलीकरण केल्याने पाणीसाठा वाढला. परंतु पावसामुळे पाणी पुन्हा गढूळ झाले. त्यामुळे ग्रामस्थांना अशुद्ध पाण्याचा पुरवठा होत आहे. ग्रामस्थ सध्या पाण्यात तुरटी फिरवून आणि उकळून पाणी पीत आहेत. मंदिर पाहण्यासाठी आलेल्या पर्यटकांनाही ग्रामपंचायतीकडून पिण्याचे पाणी देता येत नाही.

पंचायत समितीकडे टँकरची मागणी
पावसाळ्यात गावाला धरणातील पाण्याचा पुरवठा केला जातो. मात्र अद्याप एकही पाणीपुरवठा योजना कार्यरत नाही. ग्रामपंचायतीने पाण्यासाठी पंचायत समितीकडे टँकरची मागणी केली आहे. परंतु कायमस्वरूपी पाणीपुरवठा योजनेसाठी ग्रामपंचायतीच्या वतीने प्रयत्न सुरू आहेत. याबाबत सरपंच मनीषा ओंबळे यांच्याशी संपर्क साधला असता त्यांनी सांगितले की शासनाकडे जलजीवन योजनेच्या माध्यमातून विहीर, पाण्याची टाकी आणि वितरण व्यवस्था यासाठी नवीन योजनेसाठी पाठपुरावा सुरू आहे.

कांबरे येथील धरणातील प्राचीन मंदिराचा आणि त्याशेजारी गाळात गाडलेल्या दोन छोट्या तळ्यांच्या संवर्धनासाठी पुरातत्व विभाग आणि इतर विभागांशीही पत्रव्यवहार सुरू आहे. कांबरेश्वराच्या मंदिराचा जीर्णोद्धार आणि ग्रामस्थांचा पिण्याच्या पाण्याचा प्रश्न कायमस्वरूपी सोडविण्यासाठी ग्रामपंचायतीकडून प्रयत्न करण्यात येत आहेत.
- मनीषा सुदाम ओंबळे, सरपंच कांबरे बुद्रूक

03695