खडकवासला - खडकवासला प्रकल्पाच्या पाणलोट क्षेत्रात चार दिवस मुसळधार पाऊस पडल्याने धरणसाठ्यात चार टीएमसीहून अधिक वाढ झाली आहे. मंगळवारी संध्याकाळी एकूण उपयुक्त पाणीसाठा ९.६६ टीएमसी झाला. शहराला दर महिन्याला सुमारे दीड टीएमसी पाण्याची आवश्‍यकता असते. यानुसार हे ९.६६ टीएमसी पाणी सहा महिने पुरेल एवढे जमा झाले आहे.

जूनमधील धरणातील पाणीसाठा कमी झाल्याने पाणीकपात सुरू होती. पाऊस मोजणे एक जूनपासून सुरू होते. त्यानुसार ३९ दिवसांत सात टीएमसी पाणी जमा झाले आहे. जमा पाणी सहा महिने म्हणजे जानेवारी २०२० पर्यंत पुरेल एवढा पाणीसाठा झाला आहे.

खडकवासला येथे १.६३ टीएमसी म्हणजे ८३ टक्के पाणीसाठा जमा झाला आहे. पानशेत ४.१४ टीएमसी म्हणजे ३९ टक्के, वरसगावमध्ये ३.४६ टीएमसी म्हणजे २७ टक्के व टेमघर धरणात ०.४५ टीएमसी म्हणजे १२.१५ टक्के पाणी जमा झाले आहे. चारही धरणांत मिळून ९.६६ टीएमसी म्हणजे ३४ टक्के पाणी जमा झाले आहे. मागील वर्षी ८.५० टीएमसी म्हणजे २९.१७ टक्के पाणीसाठा जमा होता. मागील वर्षीपेक्षा एक टीएमसीने आज जास्त पाणीसाठा आहे.