पुणे - इमारतीच्या दहाव्या मजल्यावरुन तोल जाऊन डक्टमध्ये पडल्यामुळे एका बांधकाम मजुराचा मृत्यू झाला. ही घटना खराडी परिसरात घडली. या प्रकरणी चौकशीनंतर चंदननगर पोलिसांनी दोन ठेकेदारांविरुद्ध गुन्हा दाखल केला आहे.

बिश्वनाथ खुदीराम बिस्वास (वय-३१, रा. खराडी, मूळ रा. पश्चिम बंगाल) असे मृत्युमुखी पडलेल्या मजुराचे नाव आहे. या प्रकरणी बिश्वनाथचा भाऊ अभिजित (वय-३२, रा. खराडी) याने फिर्याद दिली आहे. त्यावरून ठेकेदार फहिम उस्मान शेख (वय-३३, रा. संजय पार्क, लोहगाव) आणि दीपन देवास समाजदार (वय-३६, रा. वाघोली) यांच्याविरुद्ध गुन्हा दाखल करण्यात आला आहे.

पोलिसांनी दिलेल्या माहितीनुसार, बिश्वनाथ आणि इतर कामगार खराडीतील चौधरी वस्तीमधील एका गृहप्रकल्पाच्या ठिकाणी काम करत होते. २१ सप्टेंबर रोजी इमारतीच्या दहाव्या मजल्यावरून तोल जाऊन बिश्वनाथ डक्टमध्ये पडला.

सुरक्षा जाळी निकृष्ट दर्जाची असल्यामुळे तो खाली पहिल्या मजल्यावर पडला. त्यात गंभीर जखमी झाल्यामुळे बिश्वनाथचा मृत्यू झाला. ठेकेदारांनी बांधकामाच्या ठिकाणी मजुरांच्या सुरक्षेसाठी पुरेशा उपाययोजना केल्या नसल्याचे चौकशीत उघड झाले. त्यानंतर पोलिसांनी ठेकेदारांविरुध्द गुन्हा दाखल केला आहे.