पुणे : पुणे महानगर नियोजन समितीची (Pune Metropolitan Planning Committee) पहिली बैठक आज (२६ जुलै) मुख्यमंत्री उद्धव ठाकरे (uddhav thackeray) यांच्या अध्यक्षतेखाली होत आहे. या समितीच्या बैठकीत समाविष्ट २३ गावांसह पीएमआरडीएच्या हद्दीचा प्रारूप विकास आराखड्यास मान्यता मिळण्याची शक्यता व्यक्त केली जात आहे. त्यामुळे या बैठकीकडे सर्वांचे लक्ष लागले आहे. (Meeting Metropolitan Planning Committee chaired uddhav thackeray)

पीएमआरडीएच्या (PMRDA) हद्दीतून वगळून २३ गावांचा समावेश महापालिकेच्या हद्दीत करणे, त्या पाठोपाठ या गावांसाठी विशेष नियोजन प्राधिकरण म्हणून पीएमआरडीएची नियुक्ती करणे आणि त्यानंतर पुणे महानगर नियोजन समिती स्थापन करण्याचा निर्णय राज्य सरकारने घेतला. असे असताना मुख्यमंत्र्यांच्या अध्यक्षतेखाली असलेल्या या समितीची पहिली बैठक सोमवारी आयोजित केली आहे. महापालिकेच्या हद्दीत २३ गावे समाविष्ट करण्यापूर्वीच पीएमआरडीएने हद्दीचा विकास आराखडा तयार केला आहे. मात्र या आराखड्यास पुणे महानगर नियोजन समितीची मान्यता आवश्‍यकता आहे.

मात्र, समितीच अस्तित्वात नसल्यामुळे विकास आराखड्याचे काम थांबले होते. परंतु राज्य सरकारने गावे समाविष्ट करण्यापासून ते पुणे महानगर नियोजन समिती स्थापन करण्याचे एकापाठोपाठ निर्णय घेऊन महापालिकेतील सत्ताधारी भाजपला दणके दिले. असे असताना समिती स्थापन होऊन चार दिवस होत नाहीत, तोच पहिली बैठक सोमवारी होत असल्याने महाविकास आघाडीने भाजपला तिसरा दणका देण्याची तयारी सुरू केल्याची चर्चा आहे. त्यामुळे राजकीय क्षेत्राबरोबरच या गावातील नागरिकांचे या बैठकीकडे लक्ष लागले आहे.