पिंपरी - केंद्र सरकारने वाहन चालविण्याचे नियम कडक केले आहेत. या पार्श्‍वभूमीवर शहरातील बहुतांश खासगी शाळांच्या व कनिष्ठ महाविद्यालयांच्या व्यवस्थापनाने अल्पवयीन मुलांना दुचाकी घेऊन येण्यास शनिवारपासून (ता. १४) सक्त मनाई केली आहे.

वाढत्या अपघातांना रोखण्यासाठी केंद्र सरकारने वाहन चालविण्याच्या नियमांचे उल्लंघन करण्याच्या रकमेत वाढ केली आहे. हरियानासह अन्य काही राज्यांनी केंद्र सरकारच्या नियमांची अंमलबजावणी सुरू केली आहे. मात्र, महाराष्ट्रात अद्याप त्याची अंमलबजावणी सुरू झाली नाही. 

विधानसभा निवडणुकीनंतर ते महाराष्ट्रातही लागू होण्याची शक्‍यता आहे. अल्पवयीन मुलांनी दुचाकी चालविल्याप्रकरणी हैदराबाद पोलिसांनी संबंधित मुलांच्या दहा पालकांना अटक केली आहे. त्याची खासगी शाळांनी गंभीर दखल घेतली आहे.

शहरात सुमारे ७० कनिष्ठ महाविद्यालये असून, त्यापैकी बहुतांश शाळांना संलग्न आहेत. त्यामुळे मुलांना शाळांप्रमाणेच शिस्त लागण्यास मदत होते. महाविद्यालयात जाताना अनेक विद्यार्थी, विद्यार्थिनी त्यांच्या दुचाकीवर जातात. केंद्र सरकारच्या नियमाचा त्यांच्यावर फारसा फरक पडला नाही.