नारायणगाव - पुणे जिल्ह्यातील यात्रा उत्सवामध्ये फड गाजवणारा नामांकित पैलवान कैलास उर्फ पिंटू गुलाब पवार (वय-39, राहणार निमगाव सावा, ता. जुन्नर) या तरुणाचा आज दुपारी मांजरवाडी येथे धारदार शस्त्राने निर्घृन खून करण्यात आला. त्या नंतर आरोपी फरार झाले आहेत.

आरोपींना अटक करण्यासाठी नारायणगाव पोलिसांनी तातडीने कार्यवाही सुरु केली आहे. याबाबत माहिती अशी, गजराबाई सोनबा साळुंके या महिलेचा अंत्यविधी आज सकाळी 11 वाजता सुमारास मांजरवाडी येथे झाला. अंत्यविधीसाठी कैलास पवार हे नातेवाईकांसह उपस्थित होते.

अंत्यविधी झाल्यानंतर कैलास पवार व नातेवाईक असलेले संशयित तीन ते पाच आरोपी हे मांजरवाडी येथील हॉटेलमध्ये दुपारी बारा वाजण्याच्या सुमारास चहापाण्यासाठी थांबले होते. दरम्यान जुन्या भांडणातून कैलास पवार व त्यांच्यात वाद झाला. त्यानंतर कैलास पवार हे बाहेर आले. येथील रस्त्यालगत असलेल्या मंदिरासमोरील झाडाजवळ संशयित आरोपींनी कैलास पवार याची छाती, पाठ व खांद्यावर धारदार शास्त्राने वार केले. या हल्ल्यात कैलास पवार हे गंभीर जखमी झाले.

उपचारासाठी त्यांना येथील ग्रामीण रुग्णालयात आणले असता उपचारापूर्वीच ते मृत झाले. यावेळी रुग्णालया बाहेर मोठा जनसमुदाय जमला होता. ग्रामीण रुग्णालयात उपविभागीय पोलीस अधिकारी रवींद्र चौधर, सहाय्यक पोलीस निरीक्षक महादेव शेलार यांनी भेट देऊन जमावाला शांत केले. शवविच्छेदनासाठी मृतदेह ग्रामीण रुग्णाला ठेवण्यात आला आहे. रुग्णालयाबाहेर बाहेर मोठ्या प्रमाणात पोलीस बंदोबस्त ठेवण्यात आला आहे.

उपविभागीय पोलीस अधिकारी रविंद्र चौधरी यांच्या मार्गदर्शनाखाली पुढील तपास सहाय्यक निरीक्षक शेलार करत आहे. संशयित आरोपींची नावे पोलिसांना मिळाली असून आरोपींना अटक करण्यासाठी पोलीस पथके रवाना करण्यात आली आहेत. गुन्हेगारांना तातडीने अटक करावी. अशी मागणी रमेश पवार यांनी केली आहे.