पुणे - डॉ. नरेंद्र दाभोलकर यांची शरद कळसकर आणि सचिन अंदुरे यांनी गोळ्या झाडून हत्या केली; पण या दोघांना ‘हेच ते दाभोलकर’ हे सांगण्यासाठी जेथे हत्या झाली, त्या ओंकारेश्‍वर पुलावर घटनेच्या अगोदर आणखी दोघे जण येऊन थांबले होते, असा दावा सीबीआयने शनिवारी न्यायालयात केला. यावरून या कटात आणखी दोघे सामील होते, हे स्पष्ट झाले आहे. 

कळसकरची कोठडीची मुदत संपल्याने सीबीआयने त्याला प्रथम वर्ग न्यायदंडाधिकारी एस. एम. ए. सय्यद यांच्या न्यायालयात हजर केले. न्यायालयाने त्याच्या कोठडीत १७ सप्टेंबरपर्यंत वाढ केली. सीबीआयचे वकील विजयकुमार ढाकणे म्हणाले, ‘‘२० ऑगस्ट २०१३ रोजी शिंदे पुलावर सकाळी सव्वासातच्या आधी दोन जण उपस्थित होते. अंदुरे आणि कळसकरने डॉ. दाभोलकर यांच्यावर गोळ्या झाडण्याआधी ते डॉ. दाभोलकरच आहेत, अशी खात्री या दोघांकडून करून घेतली. त्यांचा शोध सुरू आहे.’’ बचाव पक्षाचे वकील धर्मराज चंडेल यांनी कोठडीला विरोध केला. 

वैभव राऊत आणि कळसकर यांनी २० जुलै २०१८ रोजी त्यांच्याकडील चार पिस्तुलांची विल्हेवाट लावली. ठाण्यातील कळवा पूल, वसईतील भाईंदर पूल किंवा कल्याण खाडी पूल यापैकी एका ठिकाणी या पिस्तुलांचे तुकडे फेकून दिल्याचे सीबीआयने न्यायालयाला सांगितले. मात्र रात्रीच्या वेळी पिस्तुलाचे तुकडे खाडीच्या पाण्यात फेकून दिल्याने नेमकी जागा कळसकरला आठवत नाही. त्याला प्रत्यक्ष जागांवर पुन्हा नेऊन अधिक तपास करायचा आहे, असे सीबीआयने सांगितले. फेकून दिलेल्या पिस्तुलांपैकी एक पिस्तुल डॉ. दाभोलकर यांच्या हत्येसाठी वापरले असावे, असा सीबीआयचा अंदाज आहे.

आरोपींना मारहाणीचा आरोप
दाभोलकर प्रकरणात सीबीआयने अटक केलेल्या अमोल काळे, राजेश बंगेरा, अमित दिगवेकरची कोठडीत कोल्हापूर एसआयटीने कॉम्रेड गोविंद पानसरे हत्येबाबत चौकशी केली. या वेळी मारहाण झाल्याचा आरोप दिगवेकरने न्यायालयात केला होता. अशा प्रकारे कळसकरला पोलिसांकडून मारहाण होऊ नये यासाठी ॲड. चंडेल यांनी न्यायालयात अर्ज करून आरोपीसोबत राहण्याची परवानगी मागितली. मात्र न्यायालयाने हा अर्ज फेटाळला.