पिंपरी - ओएलएक्‍सवर विकलेल्या मोटारीचे पैसे न देता विविध कारणे सांगून एक लाख दहा हजार रुपये उकळून एकाची साडेनऊ लाखांची फसवणूक सांगवीत झाली आहे. 

मिता प्रणवकुमार भट्टाचार्य (वय 58, रा. पवनानगर, जुनी सांगवी) यांनी सांगवी ठाण्यात फिर्याद दिली. संजय गुलाबचंद गिडवानी (पत्ता माहिती नाही), असे गुन्हा दाखल झालेल्या संशयिताचे नाव आहे. पोलिसांनी दिलेल्या माहितीनुसार, भट्टाचार्य यांनी मोटार विकण्याची जाहिरात ओएलएक्‍सवर प्रसिद्ध केली. ती पाहून गिडवानी यांनी संपर्क साधला तसेच मोटारीच्या खरेदीसाठी आठ लाख रुपयांचा धनादेश दिला. मात्र तो वटला नाही. यामुळे त्यांनी पुन्हा गिडवानी यांच्याशी संपर्क साधला. तेव्हा बॅंक खात्यात 60 हजार रुपये कमी असल्याने धनादेश वटला नसल्याचे सांगितले. भट्टाचार्य यांना खात्यात 60 हजार रुपये भरण्यास सांगितले. त्यानंतर एका व्यक्‍तीचे माझ्याकडे 50 हजार रुपये आहेत. ते पैसे त्याला दिल्यास मोटार सुटेल, अन्यथा तुमच्या मुलाच्या नावावर मोटार असून तिचा गैरवापर केल्याचा ठपका येईल, असे सांगून पुन्हा 50 हजार रुपये उकळले. फसवणूक झाल्याचे लक्षात येताच भट्टाचार्य यांनी सांगवी ठाण्यात फिर्याद दिली. पोलिस उपनिरीक्षक श्रीकांत पाटील तपास करीत आहेत.