मुंढवा : दहावीचा बदललेला अभ्यासक्रम आणि परीक्षा पद्धतीतील बदल याबद्दल विद्यार्थी पालक व शिक्षकांमध्ये असलेला संभ्रम दूर करण्यासाठी "सकाळ'ने वानवडी येथील महात्मा फुले सांस्कृतिक भवन येथे कार्यशाळेचे आयोजन केले होते. या कार्यशाळेत विद्यार्थी, पालक व शिक्षकांच्या मनात अभ्यासक्रमाविषयी असलेल्या शंका दूर झाल्या. मुलांकडून अभ्यास कसा करून घ्यावा, याचे तंत्रही पालकांना समजले. 

डॉ. सुनील मगर, संचालक बालभारती 

- यापूर्वी ज्ञानावर आधारित प्रश्न विचारले जायचे; परंतु विद्यार्थ्याला राष्ट्रीय पातळीवर स्पर्धा करता यावी म्हणून नव्या अभ्यासक्रमाची रचना केली आहे. 
- पालकांनी अभ्यास करण्याविषयी मुलांवर कोणताही दबाव आणू नये. 
- पूर्वी शाळेकडून 20 गुण विद्यार्थ्यांना दिले जायचे. ती पद्धत आता बंद करण्यात आली आहे. 
- पालक-विद्यार्थ्यांनी दहावीची भीती मनात बाळगू नये 
- काळाच्या आवश्‍यकतेनुसार अभ्यासक्रम तयार केला आहे. 

उमेश प्रधान, शिक्षणतज्ञ 

- मुलांचे स्वप्न तेच पालकांचे असले पाहिजे. आपल्या अपेक्षांचे ओझे त्यांवर लादू नये. 
- पूर्वी प्रश्नपत्रिका होती. नवीन अभ्यसक्रमानुसार त्याऐवजी ती कृतिपत्रिका झाली. प्रश्नांची जागा तिने घेतली आहे. - पूर्वीप्रमाणे यात पाठांतराला वाव नाही. यात उत्तरांची विविधता आहे. त्याचा उपयोग करण्यासाठी "सकाळ' वर्तमानपत्रात येणारी विविध सदरे वाचावीत. 
- विद्यार्थ्यांनी वेळेचे नियोजन करणे महत्त्वाचे आहे. 

- प्राजक्ती गोखले, गणिततज्ज्ञ 

- नवीन अभ्यासक्रमात गणित विषयाचे फायनांशियल मॅपिंग केले आहे. 
- दहावीत जीएसटी असला तरी कोणत्या वस्तूवर किती कर लागू आहे, हे अपेक्षित नाही. 
- केवळ जीएसटीची ओळख होऊन शेकडेवारीचे गणित अपेक्षित आहे. 
- कन्सेप्ट मॅपिंगला विशेष महत्त्व आहे. 
- मुलांनी गणिताचे पुस्तक वाचावे. सरावासाठी त्यात व्हिडीओ जोडले आहेत. गणिताचा सराव करावा. 

कृष्णा उपाळकर (विद्यार्थी) ः नवीन अभ्यासक्रम व प्रश्नपत्रिकेऐवजी कृतिपत्रिका यामुळे मनात संभ्रम निर्माण झाला होता. आज "सकाळ'ने केलेल्या मार्गदर्शनामुळे मनाला भेडसावणारे प्रश्न दूर होण्यास मदतच झाली. त्यामुळे मार्गदर्शनाप्रमाणे अभ्यास केल्यास गुणवत्ता वाढण्यास मदत होईल. 

दीपाली कवडे (पालक) ः "सकाळ'ने आयोजित केलेल्या दहावीचे विद्यार्थी व त्यांच्या पालकांसाठी मार्गदर्शन कार्यशाळा चांगली होती. "सकाळ' नागरिकांच्या महत्त्वाच्या प्रश्नांवर योग्य उपाय शोधत असतो व त्याचा पाठपुरावा करून ते पूर्णही करतो. त्याचप्रमाणे दहावीच्या नवीन अभ्यासक्रमावर आधारित कार्यशाळेत मुलांना मार्गदर्शन करून अभ्यासाच्या नियोजनाविषयी चांगली माहिती दिली. 

संजीव यादव (उपप्राचार्य) ः विद्यार्थ्यांच्या दृष्टिकोनातून गणित व इंग्रजी या विषयाची भीती मुले बोलून दाखवत होती; परंतु या कार्यशाळेमुळे मुलांनी मनातील भीती दूर झाल्याचे मला सांगितले. "सकाळ'चे मार्गदर्शन विद्यार्थ्यांसाठी मोलाचे ठरले आहे.