पुणे - पुणे शहर पोलिस आयुक्तालयातील पोलिस शिपायाच्या भरती प्रक्रियेला बुधवारपासून सुरुवात झाली. २०२ रिक्त पदांसाठी २० हजार ३८२ उमेदवारांचे अर्ज प्राप्त झाले आहेत. त्यात १८ हजार ७१४ पुरुष आणि एक हजार ६६८ महिला उमेदवारांचा समावेश आहे.

पोलिस भरतीसाठी सर्वसाधारण गटातून १९ हजार ३५२ अर्ज, माजी सैनिक गटातून ७७९ आणि खेळाडू गटातून २६९ उमेदवार भरती प्रक्रियेत सहभागी झाले आहेत. शिवाजीनगर येथील पोलिस मुख्यालयाच्या मैदानावर १२ जुलैपर्यंत उमेदवारांची शारीरिक चाचणी सुरू करण्यात आली आहे. पहिल्या दिवशी बुधवारी पोलिस शिपाई आणि चालक पदासाठी सर्वसाधारण गटातील ५०० पुरुष उमेदवारांची शारीरिक चाचणी घेण्यात आली.

कारागृह शिपाई पदासाठी भरती

पुणे शहर कारागृह पश्चिम विभागातील ५१३ रिक्त पदांसाठी एक लाख १० हजार ४८८ उमेदवारांचे अर्ज प्राप्त झाले आहेत. त्यात ८५ हजार ५१६ पुरुष आणि २४ हजार ९६७ महिला उमेदवारांचे अर्ज प्राप्त झाले आहेत.

भरती प्रक्रिया पारदर्शकपणे होत आहे. त्यामुळे कोणाच्याही प्रलोभनाला बळी पडू नये. कोणी आमिष दाखवत असल्यास दक्षता अधिकाऱ्यांना संपर्क साधावा. आमिष दाखविणाऱ्या व्यक्तीविरुद्ध कारवाई करण्यात येईल.

- अरविंद चावरिया, अतिरिक्त पोलिस आयुक्त (प्रशासन)

मुंबईत झालेल्या पोलिस भरती प्रक्रियेत दोन गुण कमी पडले. दुसऱ्यांदा पूर्ण तयारीनिशी भरतीसाठी आलो आहे. शारीरिक चाचणी पूर्ण झाली. यापूर्वी कुटुंबातील कोणी पोलिस दलात नाही. परंतु पोलिस व्हावे, अशी माझी आणि कुटुंबीयांची अपेक्षा आहे.

- विनायक मुसळे, नाशिक

दक्षता अधिकारी

अतिरिक्त पोलिस आयुक्त मनोज पाटील, पोलिस उपायुक्त हिम्मत जाधव आणि संदीपसिंग गिल

मोबाईल क्रमांक : ८९७५२८३१००