Pune Orange alert : बंगालच्या उपसागरातील कमी दाबाचे क्षेत्र, दक्षिणेकडे सरकलेला मॉन्सूनचा आस, अरबी समुद्रावरून वाहणारे जोरदार प्रवाह यामुळे पुण्यासह राज्यात पावसाचा जोर वाढला आहे. पुणे शहरात मंगळवारी रात्रभरात सरासरी २० मिलीमीटर पाऊस पडला, तर चिंचवड परीसरात तब्बल ५४.५ मिलीमीटर पावसाची नोंद झाली. मॉन्सून दाखल झाल्यानंतर प्रथमच मोठ्या प्रमाणावर पाऊस पडला आहे. बुधवारी पहाटे तीन वाजता हवामान खात्याने घेतलेल्या नोंदीवरून हे स्पष्ट झाले आहे.(pune weather update Two days rain)

बुधवारी दिवसभरही शहर व परिसरात पावसाचा जोर कायम राहील, तर निवडक ठिकाणी संततधार पाऊस पडेल, असा अंदाज हवामान खात्याने वर्तविला आहे. पुणे जिल्ह्यात घाटमाथ्यावर मुसळधार पाऊस पडण्याची शक्यता आहे.

मॉन्सूनने आता संपुर्ण देश व्यापला असून, महिन्याभराच्या प्रतीक्षेनंतर तो सक्रिय झाला आहे. कोल्हापूर, सांगली भागात अतिवृष्टी झाली असून, उर्वरित राज्यातही माध्यम ते जोरदार पाऊस पडत आहे. पुणे आणि नाशिक शहरात ऑरेंज अलर्ट देण्यात आला आहे.

सह्याद्रीच्या घाटमाथ्यावर आणि कोकणात दरड कोसळण्याची शक्यता सतर्क संस्थेच्या वतीने वर्तविण्यात आली आहे. संततधार पावसात संभाव्य रस्त्यावरून प्रवास टाळण्याचे आवाहन करण्यात आले आहे. पुढील पाच दिवस कोकण, मध्य महाराष्ट्र आणि मराठवाड्यातील काही जिल्ह्यांत मुसळधार ते अतिमुसळधार पाऊस पडण्याची शक्यता हवामान खात्याने वर्तविली आहे.