पुणे - लालसर आणि चवीला आंबटगोड असलेल्या स्ट्रॉबेरीचा हंगाम बहरात आला आहे. मार्केट यार्ड येथील फळबाजारात स्ट्रॉबेरीची आवक वाढली असून, मागणीही मोठ्या प्रमाणात असल्याने भावांत वाढ झाली आहे.

परतीच्या पावसामुळे स्ट्रॉबेरी हंगाम यंदा उशिरा सुरू झाला. सध्या हवामान पोषक असल्याने स्ट्रॉबेरीचे उत्पादन वाढले आहे. फळांचा आकार चांगला होत असून गोडीही वाढत आहे. दरवर्षी ऑक्‍टोबर महिन्यात स्ट्रॉबेरी हंगाम सुरू होतो. या वेळी हंगाम उशिरा सुरू झाला. सुरवातीला उत्पादन कमी असल्याने आवक मर्यादित होती. फळांचा आकारदेखील छोटा होता. आता आवक चांगली होऊ लागली आहे. तुलनेत मागणीही वाढल्याने स्ट्रॉबेरी ‘भाव’ खाऊ लागली आहे.

गेल्या आठवड्यात स्ट्रॉबेरीच्या प्रतिदोन किलोला १५० ते २०० रुपये भाव मिळत होता. बाजारात रविवारी (ता. १७) स्ट्रॉबेरीची सुमारे चार टन आवक झाली असून, या हंगामातील ही सर्वांत मोठी आवक आहे. त्यानुसार मागणीही वाढल्याने प्रतिदोन किलोला २०० ते ३०० रुपये भाव मिळाल्याचे व्यापारी अरविंद मोरे यांनी सांगितले. 

महाबळेश्वर, पाचगणी, वाई, भिलार, जावळी आणि भोर तालुक्‍यातून आवक होत आहे. पुण्यातून हा माल गोवा आणि गुजरातला पाठविला जात आहे. त्याचप्रमाणे कोलकता, कर्नाटक, बंगळूर, तमिळनाडू, राजस्थान, उत्तर प्रदेश आणि दिल्ली येथूनही मागणी वाढल्याचे मोरे यांनी नमूद केले. घरगुती ग्राहकांबरोबरच कॅंडी, आइस्क्रीम, पल्प, सिरप, जेली उत्पादक कंपन्यांकडून स्ट्रॉबेरीला मोठी मागणी आहे. विंटर, एसए कॅमेर ओझा, नादीला, आर, स्वीट चार्ली आदी वाण उपलब्ध झाले असून, पुढील दोन महिने हंगाम चालण्याचा अंदाज आहे.