मांजरी - मराठा आरक्षण मागणी व त्यासाठी मनोज जरांगे पाटील यांनी सुरू केलेल्या उपोषण आंदोलनाच्या समर्थनार्थ यथील सकल मराठा समाजाच्या वतीने मशाल व कँडल मार्च काढण्यात आला होता. महादेवनगर येथील अण्णासाहेब मगर महाविद्यालय ते मांजरी बुद्रुक गावठाणातील छत्रपती शिवाजी महाराज स्मारक असा सुमारे चार किलोमीटर हा मोर्चा होता. डोक्यावर भगव्या टोप्या, एक मराठा-लाख मराठा, आरक्षण आमच्या हक्काचे-नाही कुणाच्या बापाचे व छत्रपती शिवाजी महाराज की जय अशा घोषणा देत अतिशय शिस्तबद्ध पध्दतीने हा मोर्चा शांततेत पार पडला.

महादेवनगर येथे आज सकाळपासून सुरू केलेल्या साखळी उपोषणातील कार्यकर्त्यांना सुरेश घुले हस्ते यांच्या हस्ते पाणी पाजून पहिल्या दिवशीचे उपोषण सोडविण्यात आले. त्यानंतर समाजातील महिलांच्या हस्ते छत्रपती शिवाजी महाराजांची आरती करून हजारो समाजबांधवांच्या सहभागाने मशाल व कँडल मार्चला सुरूवात झाली. मोर्चा पुढे जात असताना रस्त्यात शेकडो समाज बांधव त्यामध्ये सहभागी झाले. महिलांचाही यामध्ये मोठा सहभाग होता.

सकल मराठा समाजाच्या उत्थानासाठी उपोषण करीत असलेले जरांगे पाटील यांनी हा लढा पुढे नेण्यासाठी जगले पाहिजे. समाज बांधवांना त्यांच्या मार्गदर्शनाची मोठी गरज आहे. त्यासाठी किमान पाणी तरी प्राशन करावे, अशी भावना कार्यकर्त्यांनी यावेळी व्यक्त केली. दरम्यान, पुढील दोन महिन्याकरिता जरांगे पाटलांनी उपोषण मागे घेतल्याने कार्यकर्त्यांनी आनंद साजरा केला.