ओतूर ता.जुन्नर -  वाढत्या चोऱ्यांच्या पर्श्वभूमीवर ओतूर पोलिस ठाण्यात आयोजित पोलिस पाटलांची व पोलिस मित्राची बैठक आयोजित करण्यात आली होती. त्यामध्ये ग्राम सुरक्षादलात तरुणांचा जास्तित जास्त सहभाग वाढवून ग्राम सुरक्षादल सशक्त करणार असल्याचे, तसेच पोलिस पाटील, पोलिस मित्र व ग्रामसुरक्षा दल यांची रात्रीची गस्त वाढवणार असल्याची माहिती ओतूर पोलिस ठाण्याचे सहायक पोलिस निरिक्षक रमेश खुणे यांनी दिली.

खुणे पुढे म्हणाले, पोलिस ठाण्यातील ओतूर व परिसरातील गावांमध्ये संशयीत व्यक्ती किंवा गाडी अढळून आल्यास त्वरित पोलिसांशी संपर्क साधावा. तसेच पोलिस ठाण्याअंतर्गत येणाऱ्या गावांमधील चौकांत, महामार्गवर तसेच महत्वाच्या ठिकाणी ग्रामपंचायत व नागरिकांच्या सहभागातून सी.सी.टी.व्ही बसवण्यासाठी आग्रही राहणार असुन, शाळा, महाविद्यालय व बसस्थानके आदी ठिकाणी महिलांच्या सुरक्षेसाठी निर्भया पथकाव्दारे टेहाळणी  करण्यात येणार आहे. महिला सुरक्षा कमीटीच्या सुचने नुसार महिला सुरक्षेसाठी मोठ्या प्रमाणात उपाय योजना राबवणार आहे. तर रोड रोमीओ व महिलांची छेडछाड करणाराची गय केली जाणार नाही.

ओतूर शहरात व परिसरात वाहतुकीला अडथळा निर्माण करणाऱ्या व्यवसायिकावर कारवाई केली जाणार आहे. त्यामुळे व्यवसायिकानी व नागरिकांनी वाहतुकीला अडथळा निर्माण होऊ नाही म्हणुन पोलिसांकडुन दिलेल्या जाणाऱ्या सुचनांचे पालन करावे. तसेच पोलिसांना सहकार्य करावे असे आवाहन यावेळी रमेश खुणे यांनी केले.

यावेळी विविध गावातील पोलिस पाटील व ओतूर पोलिस ठाण्याचे कर्मचारी व पोलिस मित्र उपस्थित होते.