पुणे : प्राचीन जैन मुनिपरंपरेसंदर्भात संशोधन प्रकल्पाची सुरवात भांडारकर संस्थेत करण्यात येणार असून, त्यासाठी लंडन विद्यापीठाचे सहकार्य मिळणार आहे. या प्रकल्पासाठी फिरोदिया ट्रस्टच्या वतीने 15 लाख रुपयांची देणगी नियामक मंडळाचे अध्यक्ष अभय फिरोदिया यांनी जाहीर केली आहे. या प्रकल्पांतर्गत प्राचीन काळातील जैनपरंपरेतील मुनी, लेखनिक आणि श्रावकांची चरित्रात्मक माहिती एकत्रित करण्यात येणार आहे. 

या संशोधन प्रकल्पाचा पुढील पाच वर्षांचा खर्च फिरोदिया ट्रस्ट करणार आहे. प्रकल्पासाठी दोंडाईचा येथील हस्ती को-ऑपरेटिव्ह बॅंकेने एक लाख रुपये आणि डॉ. शैलेश गुजर यांनी 21 हजारांची मदत यापूर्वीच केली आहे, असे फिरोदिया यांनी सांगितले. लंडन विद्यापीठाने जैन परंपरेतील माहिती एकत्रित करण्यासाठी संगणकीय प्रणाली विकसित केली आहे.

भांडारकर संस्थेच्या हस्तलिखित संग्रहात जैन धर्माशी संबंधित पाच हजार हस्तलिखिते, पोथ्या आहेत. या पोथ्यांमध्ये जैन धर्माशी संबंधित व्यक्‍तींची माहिती आढळते. संस्थेच्यावतीने डॉ. अमृता नातू यांना आधुनिक संगणक प्रणाली प्रशिक्षणासाठी लंडन येथे पाठविले आहे.