पिंपरी चिंचवड : पिंपरी चिंचवडमध्ये होळीच्या निमित्ताने पार्थ-रोहित या पवार बंधूंनी एकत्रित येत त्यांच्या बद्दलच्या वायफळ चर्चाचं दहन केलं. संत तुकारामनगर येथे पार्थ आणि रोहितने होळीचे काल (ता. 20) पूजन केले.

माढा लोकसभेतून आजोबा आणि पक्षाचे अध्यक्ष शरद पवार यांनी पार्थसाठी माघार घेत, पार्थचा मावळ लोकसभेचा मार्ग मोकळा केला होता. तेव्हा आजोबांनी पुनर्विचार करावा अशी जाहीर विनंती रोहितने केली होती. या विनंतीने पार्थ-रोहित मध्ये वादाचा रंग असल्याची चर्चा राज्यभर रंगली. सोशल मीडियावर तर या पवार बंधूंवर फवारे उडवले गेले. पण या फवाऱ्यांना बेरंग करत दोघांनी सर्वांची बोलती बंद केली.

होळीच्या निमित्ताने पार्थ-रोहितने वादाच्या चर्चांचे दहन केले. आजोबा आणि बाबानंतर आता पार्थसाठी भाऊ ही मैदानात उतरलाय. सध्या सोशल मीडियावर विविध अंगांनी प्रचाराचा रंग उधळणारा पार्थ जाहीर सभेत फिका पडू लागलाय. पण आता रोहितच्या फवाऱ्यांनी जाहीर सभेतील ती कमतरता भरून निघेल हे नक्की.

काल (ता. 20) पार्थ पवार यांचा वाढदिवस होता. त्यानिमित्त रोहित पवार यांनी काल एक पोस्ट शेअर केली होती.