रामवाडी - जागतिक पर्यावरण दिन व मोदी सरकार ८ वर्षपूर्ती या निमित्त सामाजिक कार्यकर्ते व पुणे जिल्हा भारतीय जनता पक्षाचे सचिव अनिल उर्फ किसन लक्ष्मण नवले यांच्या माध्यमातून वडगावशेरी परिसरात स्वच्छता मोहिमेचे आयोजन करण्यात आले. यामध्ये क्रांती मित्र मंडळाचे कार्यकर्ते मोठ्या संख्येने सहभागी झाले होते.

कार्यक्रमाची सुरुवात विघ्नहर्ता गणपती मंदिर क्रांतीनगर येथे पर्यावरण प्रतिज्ञा ने घेण्यात आली यावेळी सर्व पर्यावरण प्रेमींनी दर महिन्याच्या पहिल्या रविवारी स्वच्छता मोहिमेमध्ये सहभागी होण्याची व इतरांनाही सहभागी करून घेण्याची प्रतिज्ञा घेतली. त्यानंतर अनिल नवले व त्यांच्या सहकाऱ्यांनी सर्वे नंबर 48/3/4 , गणेशनगर चौक परिसर व आनंद पार्क मधील रस्त्यावर पडलेल्या प्लास्टिकच्या कचऱ्याचे संकलन केले.

प्लास्टिकचा कचरामुळे विशेष करून पावसाळ्यामध्ये ड्रेनेज लाईन तुंबल्याने पाण्याचा निचरा होत नाही त्यामुळे ड्रेनेजचे पाणी रस्त्यावर साचते व नागरिकांच्या घरांमध्ये शिरते म्हणून नागरिकांनी प्लास्टिक पिशव्या व इतर प्लास्टिक कचरा इतरत्र फेकू नये व प्लास्टिकचा कमीत कमी वापर करावा असा संदेश या वेळी अनिल नवले यांच्या माध्यमातून देण्यात आला. सदर कार्यक्रमाचे संयोजन अनिल नवले व क्रांती मित्र मंडळाच्या माध्यमातून करण्यात आले होते.