Sawai Gandharva 2019 : पुणे - सतार- व्हायोलिनच्या जुगलबंदीतलं चैतन्य, नृत्यातील ऊर्जा आणि तरुण कलाकारांच्या नादमय सर्जनातून संगीताचा परमोच्च आविष्कार शनिवारी सवाईमध्ये साकारला.

महोत्सवाच्या चौथ्या दिवसाची सुरुवात तरुण गायक ओंकारनाथ हवालदार यांच्या गायनाने झाली. त्यांनी ‘मुलतानी’च्या विस्तारात रागाच्या वैशिष्ट्याचे अनेक पदर उलगडले आणि या रागाचा दिमाख रसिकांना दाखविला. त्यांची तिन्ही सप्तकांतील लिलया फिरत, जोरकस ताना याला भरभरून दाद मिळाली. किराणा, जयपूर आणि आग्रा घराण्याच्या गायकीचा वापर त्यांनी केला. ‘माझे माहेर पंढरी’ हा अभंग त्यांनी मराठी आणि कन्नड भाषेत सादर केला, त्यालाही रसिकांनी टाळ्यांच्या गजरात दाद दिली. त्यांच्या सादरीकरणाचे आणखी वैशिष्ट्य म्हणजे, त्यांना तबल्यावर केदारनाथ हवालदार आणि संवादिनीवर समीर हवालदार या दोन भावांनी साथसंगत केली.
हवालदार यांच्या रंगतदार सादरीकरणानंतर सतारवादक शाकीर खान आणि व्हायोलिनवादक तेजस उपाध्ये यांची जुगलबंदी रंगली आणि रसिकांमध्ये चैतन्याची लहर उसळली. त्यांनी किरवाणीतलं अमूर्त लालित्य वादनातून समोर ठेवलं.

ताज्या बातम्यांसाठी डाऊनलोड करा ई-सकाळचे ऍप

आलापामधून रागाचे तलम अंतरंग उलगडले. तबलावादक पं. विजय घाटे यांच्या साथीने झपताल, अधा त्रिताल आणि त्रिताल या रागाचे पदर खोचून नक्षीदार स्वराकृतींची पेरणी केली. त्याला प्रचंड प्रतिसाद रसिकांकडून मिळाला.स्वामी कृपाकरानंद यांनी पटदीप राग सादर करताना विलंबित एकतालात शिवसूरज आणि त्रितालात तिलक ललाटे या बंदिशींतून शैलीदार गायकीची अनुभूती दिली. त्यानंतर ‘घोर घोर गरज गरज’, ‘डिमी डिमी डिमी डमरू बाजे’ या रचना आणि ‘अबीर गुलाल उधळी तरंग’ या रचना सादर केल्या. त्यांना संवादिनीवर अविनाश दिघे आणि तबल्यावर महेश देसाई यांनी साथसंगत केली. नृत्यांगना रिला होता यांनी ओडिशी नृत्याविष्कार पेश केले.