मंचर : “वाचनातून माणसाला जगभरातील ज्ञान प्राप्त होते. अनेक गोष्टी समजतात. त्यामुळे माणूस विचार करू लागतो. आजच्या शिक्षकांनी विद्यार्थ्यांना घोकंपट्टी करण्याची सवय लावली आहे. तुम्हाला शिकविलेले ज्ञान समजून घ्या. तर तुमची विचार करण्याची क्षमता वाढेल. विद्यार्थ्यांनी भरपूर वाचन केले पाहिजे. नवे प्रश्न तेव्हा निर्माण होतील, जेव्हा आपण वाचायला सुरवात करू’’ असे मत साहित्य संमेलनाचे माजी अध्यक्ष डॉ. नागनाथ कोत्तापल्ले यांनी व्यक्त केले.

फलोदे (ता. आंबेगाव) येथे शहीद राजगुरु ग्रंथालयात 'आम्ही पुणेकर' संस्थेतर्फे 'व्हील फॉर एज्युकेशन' या उपक्रमांतर्गत दुर्गम आदिवासी भागात एकूण 500 सायकली व शालेय शैक्षणिक साहित्यांचे वाटप करण्यात आले. यावेळी डॉ. कोत्तापल्ले बोलत होते. यावेळी धर्मादाय सहआयुक्त दिलीप देशमुख, उद्योजिका नयना चोपडे, पंडित वसंत गाडगीळ, आम्ही पुणेकर संस्थेचे सचिव हेमंत जाधव, अरविंद जडे, अखिल झांजले, दत्ता गायकवाड, समीर देसाई, अॅड. दिलीप हांडे, डॉ. वेदव्यास मोरे, डॉ. प्रियंका जावळे, शरद देशमुख उपस्थित होते. यावेळी विद्यार्थ्यांसाठी 300 पुस्तके देण्यात आली.

डॉ. देशमुख म्हणाले, “शिक्षणासाठी खेड्यातील मुलांसाठी ज्या सुविधा उपलब्ध करून देता येतील. त्यासाठी नक्की प्रयत्न करू. धर्मदाय आयुक्तालयाकडून दुर्गम आदिवासी भागात मुलांना एक हजार सायकल वाटपाचा प्रकल्प केला आहे. आम्ही पुणेकर संस्थेतर्फे व्हील फॉर एज्युकेशन या उपक्रमासाठी सायकली कमी पडल्यास मदत केली जाईल''.

हेमंत जाधव म्हणाले, “आम्ही पुणेकर संस्थेच्या व्हील फॉर एज्युकेशन या उपक्रमांतर्गत आंबेगाव तालुक्यातील दुर्गम आदिवासी भागातील तळेघर, राजापूर, पिंपरी, चिखली, फलोदे, जांभोरी, पाटण, आंगणे अशा एकूण 23 गावांची निवड करण्यात आली.  विद्यार्थ्यांसाठी 500 ते 600 सायकली तत्काळ पुरविण्याचा निर्णय घेतला आहे. या कामासाठी सहधमार्दाय आयुक्तांनी मदतीचे आश्वासन दिले आहे.’’ सरपंच मनिषा मेमाणे यांनी स्वागत केले. अमोल वाघमारे यांनी आभार मानले.