जुन्नर : इंडिया पोस्ट पेमेंट बँकेच्या विविध सुविधा ग्रामीण भागातील नागरिक विशेषतः महिलांसाठी उपयुक्त असून या सेवेचा अधिकाधिक नागरिकांनी लाभ घ्यावा असे आवाहन आमदार शरद सोनवणे यांनी येथे केले.

जुन्नर येथील पोस्ट पेमेंट बँकेच्या उदघाटन प्रसंगी ते बोलत होते. यावेळी उपनगराध्यक्ष अलका फुलपगार, पोलिस निरीक्षक यशवंत नलवडे, माजी नगरसेवक मधुकर काजळे, उपविभागीय डाक निरीक्षक नेहा कुमारी, जुन्नर उपविभागाचे सहायक अधीक्षक एस. एस. जोशी, उपडाकपाल जयश्री जाधव, डी. एम. कोकणे तसेच नागरिक उपस्थित होते. जुन्नर उपविभागातील येणेरे, निरगुडे, खानापूर येथेही स्थानिक सरपंचाच्या उपस्थितीत या सेवेचा शुभारंभ करण्यात आला.

सोनवणे म्हणाले, सर्वसामान्यांच्या जिव्हाळ्याचे टपाल खाते डिजिटलच्या जमान्यात मागे पडत चालले होते त्यास नवसंजीवनी देण्याचे काम पंतप्रधानांनी केले आहे. पोस्ट बँक सेवेच्या माध्यमातून हा जिव्हाळा पुन्हा निर्माण होण्यास मदत होणार आहे.

यावेळी संतोष जोशी यांनी बँकेच्या कार्यपद्धतीची माहिती दिली. नलवडे, फुलपगार व काजळे यांची भाषणे झाली.मेघनाथ जाधव यांनी सूत्रसंचालन व आभार प्रदर्शन केले.