शिर्सुफळ (पुणे) : कटफळ (ता. बारामती) परिसरातील औद्योगिक क्षेत्रामध्ये असलेल्या बाऊली कंपनीच्या परिसरात सोमवारी (ता. 9) पहाटे बिबट्या कंपनीच्या सीसीटीव्हीमध्ये आढळला. त्यामुळे सर्वत्र घबराट पसरली. 

बिबट्यासदृश प्राणी कंपनीत घुसल्याच्या भीतीमुळे कंपनीचे अधिकारी व कर्मचारीही भीतीनेच आपल्या केबिनमध्येच बसून राहिले. दरम्यान पाच वाजता वन विभागाच्या अधिकारी व कर्मचाऱ्यांनी कंपनीचा संपूर्ण परिसरात शोध घेतला. मात्र, काहीही आढळून आले नाही. यावरून तो तेथून पसार झाला असावा, अशी शक्‍यता व्यक्त केली जात आहे. तसेच, कंपनीतील सीसीटीव्ही फुटेज पाहिले असता व पायाच्या ठशांवरून तो बिबट्या असल्याचे वन विभागाने सांगितले. कंपनीच्या मागील बाजूने तो निघून गेल्याचा अंदाजही त्यांनी व्यक्त केला. 
दरम्यान, बारामतीच्या पट्ट्यात बिबट्या आढळल्याने परिसरातील गावांमध्ये भीतीचे वातावरण निर्माण झाले आहे. याबाबत वन विभागाने संबंधित भागातील ग्रामस्थांनी समूहाने राहत काळजी घेण्याचे आवाहन केले आहे. 

""बारामती औद्योगिक वसाहत परिसरात बाऊली कंपनीत वाघ शिरल्याची सोमवारी पहाटेपासून चर्चा होती. याबाबत पहाटे पाच वाजता वन विभागाने कंपनीत पाहणी केली. त्यावेळी संबंधित प्राणी पसार झाला होता. या वेळी कंपनीच्या सीसीटीव्हीची पाहणी केली असता तो प्राणी वाघ नसून बिबट्या असल्याचे दिसले. त्यामुळे परिसरातील ग्रामस्थांनी योग्य ती खबरदारी घ्यावी. एकट्याने न फिरता समूहाने वावरावे,'' असे आवाहन बारामती वन विभागाचे वनपाल त्रिंबक जराड यांनी केले. 
 

बारामती औद्योगिक क्षेत्रातील गजबजलेल्या भागात बिबट्याचा वावर हा मानवाने वनक्षेत्रात केलेल्या घुसखोरीचे परिणाम आहेत. बिबट्यापासून आपल्याला सावधानता आणली पाहिजे, नाहीतर आपल्यावर हल्ला होऊ शकतो. यासाठी काठीला घुंगरू बांधून उसाला व इतर पिकांना पाणी देणे किंवा एकत्रितपणे पाणी देणे. समूहाने राहणे. एवढी काळजी सर्वांना घ्यावी लागेल. वन्यजीव व मानव संघर्ष अटळ आहे. 
- डॉ. महेश गायकवाड, 
प्राणिमित्र