मोरगाव - जळगाव क.प. (ता. बारामती) येथील शंभर टक्के शेतकऱ्यांना पुरंदर योजनेच्या पाण्याचा लाभ मिळावा यासाठी येथील शेतकऱ्यांनी उपमुख्यमंत्री अजित पवार यांच्याकडे पाठपुरावा केला होता. शेवटी पवार यांच्या सूचनेनुसार येथील वाढीव पाइपलाइनच्या कामास मंजुरी मिळाली. त्याच्या कामाचा नुकताच प्रारंभ करण्यात आला.
पुरंदर योजना बारामतीच्या जिरायती भागातील शेतकऱ्यांना शाश्वत शेतीसिंचनासाठी वरदान आहे. या योजनेसाठी पुणे जलसंपदा विभागाकडून ४५ लाख रुपयांचा निधी उपलब्ध झाल्याची माहिती पुरंदर उपसा सिंचन योजनेचे शाखा अभियंता मोहन कांबळे यांनी दिली. ही पीव्हीसी आठ इंच अशी असून यामुळे जळगाव गावाच्या ज्या हद्दीत पुरंदर योजनेचे पाणी जात नव्हते. तिथे पाणी सहजपणे पोचण्यास मदत होणार आहे. ही पाइपलाइन मंजूर व्हावी यासाठी बारामती जिरायती भाग पाणी परिषदेचे निवृत्ती ताम्हाणे, विकास शेळके बजरंग वाबळे यांनी विशेष पाठपुरावा उपमुख्यमंत्री अजित पवार यांच्याकडे केला होता.
पाइपलाइनच्या कामाचा प्रारंभ करताना बारामती राष्ट्रवादी काँग्रेसचे तालुकाध्यक्ष संभाजी होळकर, पुरंदर उपसा सिंचन योजनेचे उपविभागीय अधिकारी रंगनाथ भुजबळ, शाखा अभियंता मोहन कांबळे, बारामती पंचायत समितीचे सदस्य राहुल भापकर, बजरंग वाबळे महेश वाबळे, विकास शेळके, निवृत्ती ताम्हाणे, दिगंबर सूर्यवंशी व शेतकरी उपस्थित होते.

वाढीव पाइपलाइनचे काम सुमारे साडे चार किलोमीटरवर असून यामुळे अनेक शेतकऱ्यांना शाश्वत पाण्याचा स्रोत उपलब्ध होणार आहे. पुरंदर योजना शेतकऱ्यांसाठी महत्त्वाची आहे. या योजनेचा लाभ घेऊन शेतकऱ्यांनी आर्थिक उत्पन्न वाढवावे
- संभाजी होळकर, तालुकाध्यक्ष, बारामती राष्ट्रवादी कॉंग्रेस.