आळेफाटा, ता. १७ ः सध्या कडक असा उन्हाळ्याचा विचार करून प्रशासनाने सकाळ सत्राच्या शाळेची वेळ कमी करण्याची मागणी पालकांकडून होत आहे. पुणे जिल्हा प्राथमिक शिक्षण अधिकारी संध्या गायकवाड यांनी ३१ मार्च रोजी काढलेल्या परिपत्रकामध्ये शाळेची वेळ ठरवून दिली आहे.
सकाळी ७. ३० ते दुपारी १२. ५५ पर्यंत तर डोंगरी भागातील शाळा सकाळी ८ ते दुपारी १. ३५ पर्यंत सुरू ठेवण्याच्या सूचना दिल्या आहेत. त्यामुळे जिल्हा परिषद शाळा दुपारी एक वाजता भर उन्हात सुटतात. दुपारी शाळा सुटण्याची वेळ प्रखर उन्हाची असते. पुणे जिल्ह्यातील ग्रामीण भागातील बहुतेक विद्यार्थ्यांना घरापर्यंत पायी चालत जावे लागते. परिणामी उन्हाचा पारा जास्त असल्याने विद्यार्थ्यांच्या आरोग्याच्या दृष्टीने घातक आहे. अतिउष्णतेमुळे विद्यार्थ्यांना उष्माघाताचा ही त्रास होऊ शकतो. त्यामुळे मुलांना शाळेत पाठवण्यास काही पालक तयार होत नाहीत. ज्या पालकांना शाळा सुटल्यावर विद्यार्थ्यांना घ्यायला जावे लागते त्यावेळेला पालकांनाही उन्हाचा त्रास होतो. परिणामी शाळेतील उपस्थिती कमी होण्याची शक्यता आहे. त्यामुळे प्रशासनाने सकाळच्या शाळेची वेळ ११ पर्यंत कमी करावी अशी मागणी होत आहे.

भर उन्हात शाळा सुटत असल्याने विद्यार्थ्यांना उन्हाचा तडाखा बसत आहे. शासनाने केलेला वेळेचा बदल अयोग्य आहे. या निर्णयामुळे पोषण आहाराची समस्या निर्माण झाली आहे. तसेच काही गावांत लोडशेडींगमुळे पंखे वापरता येत नाहीत. पिण्याच्या पाण्याची समस्या आहे.
-महेंद्र गणफुले, राज्य प्रवक्ते मुख्याध्यापक महामंडळ