आंबेठाण, ता. २० : खेड, शिरूरसह पुणे शहराच्या पूर्व भागाला वरदान ठरलेल्या भामा आसखेड (ता. खेड) धरणात आजअखेर (ता. २०) २९.७६ टक्के पाणीसाठा जमा झाला आहे. मागील वर्षीच्या तुलनेत हा पाणीसाठा दुप्पट असून, मागील वर्षी आजच्या तारखेला धरणात १४.७० टक्के पाणीसाठा शिल्लक होता.
भामा आसखेड हे खेड तालुक्यातील पश्चिम भागात भामा नदीवर उभारलेले मातीचे धरण आहे. धरणाची पाणी साठवण क्षमता ८.१४ टीएमसी इतकी आहे. चालू वर्षी धरण परिसरात १ जूनपासून १३९ मि.मी. पावसाची नोंद झाली आहे. धरणात सध्या एकूण पाणीसाठा २.९१ टीएमसी असून, उपयुक्त पाणीसाठा २.४३ टीएमसी इतका आहे.
धरणातून पुणे शहराच्या पूर्व भागासह तीर्थक्षेत्र आळंदीला पाणी पुरवठा केला जात आहे. धरणातून पुढील काळात पिंपरी-चिंचवड शहराला पाणी पुरवठा सुरू होणार आहे. पिंपरी चिंचवडकरिता भामा आसखेड धरणातून २.१४ टीएमसी पाणीसाठा देण्यात येणार आहे.
सध्या धरण क्षेत्रात पावसाचे प्रमाण अधिक असल्याने पाणीसाठा झपाट्याने वाढत आहे. धरणाच्या बुडीत क्षेत्रात पर्यटनाची अनेक ठिकाणे आहेत. सध्या डोंगरांना पाझर फुटल्याने अनेक ठिकाणी धबधबे सुरू झाले आहेत, याचा आनंद घेण्यासाठी पर्यटक खेड तालुक्याच्या पश्चिम भागात मोठ्या प्रमाणात येतात. पर्यटकांनी या भागात येताना काळजी घ्यावी, असे आवाहन सहाय्यक अभियंता (श्रेणी १) आश्विन पवार, शाखा अभियंता नीलेश घारे, कालवा निरीक्षक वसंत ढोकरे यांनी केले आहे.