आंधळगाव, ता.१४ : शिरूर तालुक्याच्या पूर्व भागात युरिया टंचाईबाबत ‘सकाळ’मध्ये बातमी प्रसिद्ध झाल्यानंतर कृषी केंद्रावर भरारी पथकाने धाड टाकल्याचे भासवले व कारवाई न करता आर्थिक वसुली करण्यासाठी आलेल्या या पथकातील अधिकाऱ्यांची तत्काळ चौकशी होऊन त्यांच्यावर योग्य ती कारवाई व्हावी, अशी लेखी तक्रार अखिल ग्राहक पंचायतीचे तालुका अध्यक्ष तथा ग्राहक संरक्षण परिषदेचे अशासकीय सदस्य संपत फराटे यांनी राज्याचे कृषी आयुक्त सूरज मांढरे यांच्याकडे केली आहे.
फराटे यांनी दिलेल्या तक्रारी अर्जात म्हटले की, शिरूर तालुक्याच्या पूर्व भागात युरियाच्या कृत्रिम टंचाईबाबत ११ जून रोजी सकाळमध्ये वृत्त प्रसिद्ध झाले होते. त्यानंतर जिल्हा कृषी विभागाच्या भरारी पथकाने वडगाव रासाई, मांडवगण, सादलगाव येथील अनेक कृषी सेवा केंद्राची तपासणी केली. त्यात बिल बुक नसणे, दुकानासमोर दर्शनी भागात साठा फलक व भावफलक नसणे अशा बाबी अनेक त्रुटी आढळून आल्या. नागरगाव येथे युरियाची टंचाई भासवत असतानाही तेथे कारवाई न करता अन्य दुकानाची तपासणी केल्याचे भरारी पथकाकडून भासवण्यात आले. भरारी पथक आल्याचे समजताच बहुसंख्य दुकाने बंद असल्याचे दिसूनही कृषी सेवा केंद्रांना फोन करून दुकान उघडण्याची तसदी भरारी पथकातील अधिकाऱ्यांनी घेतली नाही. शिरूर तालुक्याचे कृषी अधिकारी दिनेश अडसूळ यांना या कारवाईपासून लांब ठेवण्यात आले. काही कृषी केंद्र चालकांनी नाव न सांगण्याच्या अटीवर दुकानदारांकडून भरारी पथकाने आर्थिक वसुली केल्याचे कळवले आहे.