आंधळगाव, ता. २२ : पुणे जिल्हा परिषदेचे मुख्य कार्यकारी अधिकारी गजानन पाटील यांच्या संकल्पनेतून ‘सायकलचा आधार-भविष्याला आकार’ (सायकल बॅंक) हा उपक्रम सुरू करण्यात आला. या उपक्रमांतर्गत पारोडी (ता. शिरूर) येथील १५ विद्यार्थिनींना बुधवारी (ता. २०) जिल्हा परिषदेच्या माजी सदस्या रेखा बांदल, भाजपचे तालुकाध्यक्ष जयेश शिंदे, राहुल कर्पे यांच्या हस्ते सायकलींचे वितरण करण्यात आले.
गावातील शालेय गरजू विद्यार्थ्यांना शाळेत जाण्यास सुलभता व्हावी, त्यांचा प्रवास वेळ वाचावा तसेच शिक्षणात सातत्य राहावे, या उद्देशाने हा उपक्रम हाती घेण्यात आला. पारोडीच्या उपसरपंच कविता टेमगिरे यांनी या उपक्रमात सक्रिय सहभाग घेत स्व-खर्चाने १५ सायकल देऊन योगदान दिले. स्थानिक ग्रामस्थांनी या उपक्रमाचे स्वागत केले आहे.
यावेळी माजी सरपंच राजाराम जाधव, ज्ञानेश्वर टेमगिरे, रवी टेमगिरे, गणेश टेमगिरे, चिंतामण टेमगिरे, सुशांत टेमगिरे, अभिषेक टेमगिरे, गणेश कोतवाल, ऋषिकेश टेमगिरे, सागर टेमगिरे, आबासाहेब ढमढेरे, मोहन येळे, संभाजी टेमगिरे, रोहन जाधव, अनिकेत खेंगट, बायडाबाई शिंदे, अक्का खेंगट उपस्थित होते.