आळंदी, ता. ७ : सतरा वर्षीय अल्पवयीन मुलीसोबत शरीरसंबंध ठेवले. मात्र, अन्य जातीची असल्याने विवाहास नकार दिल्यावरून आळंदीत पीडित मुलीच्या फिर्यादीवरून एकावर पोक्सोअंतर्गत गुन्हा दाखल केला. शंकर मंचक यादव (वय २५, रा. आळंदी) असे आरोपीचे नाव असून, अधिक चौकशीसाठी आळंदी पोलिसांनी त्याला ताब्यात घेतले आहे.
याबाबत बुधवारी (ता. ६) रात्री साडेआठच्या दरम्यान गुन्ह्याची नोंद केली. पीडित मुलीला शंकर यादव याने मागील एक वर्षापासून आळंदी परिसरातील विविध लॉजवर नेले व शरीरसंबंध ठेवले. त्यानंतर केवळ परजातीची असल्याने लग्नास नकार दिला. याबाबात मुलीने दिलेल्या फिर्यादीवरून तरुणावर पोक्सो आणि अनुसूचित जाती जमाती अत्याचार प्रतिबंध कायद्याप्रमाणे गुन्हा दाखल आहे. याबाबत सहायक पोलिस आयुक्त राजेंद्रसिंह गौर, वरिष्ठ पोलिस निरीक्षक भीमा नरके, पोलिस उपनिरीक्षक डी. आर. साळी आणि सी. एम. बोरकर यांनी पीडित तरुणीची भेट घेत विचारपूस केली. अधिक तपास आळंदी पोलिस करत आहेत.